O Supremo abre unha investigación para indagar as causas do aumento do prezo da luz

A Fiscalía do Civil do Tribunal Supremo vén de abrir hoxe unhas dilixencias de investigación co fin de pescudar as razóns que están a orixinar os sucesivos aumentos de prezo que experimentaron os recibos da luz.

Estas dilixencias realízanse en defensa da protección dos intereses dos consumidores e usuarios, co fin de determinar a realidade e natureza destes feitos, segundo informa o Ministerio Público nunha nota.

Esta mesma semana o ministro de Enerxía, Turismo e Axenda Dixital, Álvaro Nadal, anunciou que o recibo da luz encarecerase de media uns 100 euros este ano se se manteñen as condicións actuais do mercado, o que supón un novo máximo desde decembro de 2013, en plena onda de frío.