Berizzo, sobre Orellana: "Comigo non pertence máis ao equipo"

O Celta busca unha saída neste mesmo mercado de inverno para Fabián Orellana, apartado do equipo por Berizzo. O adestrador declarou esta mañá que non conta máis co chileno: "Decidín apartar a Orellana por unha falta de respecto. A miña decisión é firme, por unha falta inaceptable, e comuniqueillo ao club, que está de acordo. Comigo non pertence máis ao equipo".

O técnico celeste foi tallante co xogador: "comuniqueille a miña decisión e acabouse o tema. Non pediu desculpas, nin fai falta". Orellana pode saír do Celta este mesmo mes de xaneiro. Segundo confirmou Felipe Miñambres, o director deportivo do club, "apoiamos a decisión do adestrador. Temos que poñer orde na situación, pero o club está por encima das persoas".

Tamén adiantou que "baseándonos no informe do adestrador o club decidiu buscarlle a Orellana unha saída consensuada en xaneiro. Buscaremos o mellor, que sería unha venda". A intención da entidade celeste é que Orellana sexa "traspasado e buscarase un substituto".