Un defecto de forma tomba unha investigación xudicial sobre as contas de Democracia Ourensá

Jácome obrigaba aos seus edís e cargos de confianza a realizar doazóns forzosas, segundo denunciaron os seus compañeiros de partido.

Os xuíces cree que a fiscalía non pode investigar outras supostas irregularidades, pois  debería haber, no seu caso, outra denuncia.

Jácome no pleno deste venres 

A Audiencia Provincial de Ourense decretou o sobresemento provisional da causa sobre presuntas irregularidades nas contas de Democracia Ourensá ao revogar, como pedía o Ministerio Público, o auto ditado o 7 de xullo polo Xulgado de Instrución Número 3 de Ourense, no que reabría o caso porque consideraba que existían indicios de malversación de fondos.

Nun auto con data de este venres e do que informou o TSXG, a Sala explica que a denuncia inicialmente formulada pretendía "examinar a tipicidade penal das supostas doazóns forzosas" que realizaba o persoal eventual contratado polo grupo político Democracia Ourensá, liderado polo alcalde de Ourense, Gonzálo Pérez Jácome.

A este respecto, entende que "non cabe, vía recurso de reforma, ampliar o obxecto do proceso penal, desprazalo do seu primitivo obxecto e introducir un novo". Para iso, considera necesaria a "interposición dunha nova denuncia na que se precisen as condutas anómalas ás que se atribúe transcendencia penal, o que non ocorre na presente denuncia".

AÍNDA PODE SER DELITO, INDICAN Os XUÍCES
"Non se prexulga na presente resolución o fondo do asunto que se introduce vía recurso", advirten os maxistrados, que recalcan que, "por unha cuestión formal", de "adecuación procedemental", estiman que "non procede a análise de feitos e condutas que non foron obxecto de denuncia, nin resultaron da previa instrución penal, todo iso sen prexuízo das accións que a parte estime exercitar ante as xurisdicións oportunas".

Deste xeito, o tribunal incide en que o procedemento penal "non é o mecanismo adecuado para obter claridade sobre a contabilidade do partido, nin sobre o destino das cantidades por este percibidas", á vez que engade que nel investíganse "feitos tipificados como delito, sen que poida ser empregado dunha forma prospectiva, como causa xeral, para a obtención de información".

Ademais, lembra que a Lei Orgánica 8/2007 de Financiamento de Partidos Políticos prevé "mecanismos para coñecer e esixir a rendición de contas aos órganos de goberno destes". O auto é firme e contra el non cabe recurso.

JÁCOME ASEGURA TER "PREOCUPACIÓN CERO"
Ao asunto referiuse este venres o alcalde e líder de Democracia Ourensá, Gonzálo Pérez Jácome, no pleno municipal ao asegurar que "no mesmo día no que os tránsfugas anuncian que se van a presentar ás eleccións" con "un novo partido político", a Audiencia "arquiva" a súa denuncia contra el "acusándolle de todo".

"Eu non lle dei moita importancia cando me denunciaron, vostedes pódeno lembrar, e tampouco lla dou ao arquivo porque eu sabía que non había nada"

"Eu non lle dei moita importancia cando me denunciaron, vostedes pódeno lembrar, e tampouco lla dou ao arquivo porque eu sabía que non había nada", manifestou Jácome, que insistiu en que ten "preocupación cero" ao asegurar que "quen sabe como están as cousas" é el.

"É curioso que o mesmo día que anuncian o seu partido é o día que a Audiencia dá carpetazo ao que foi o golpe de estado, aquilo todo que se orixinou en 2020 como un golpe de estado", sinalou.

Así, sostivo que "dicían que" lle "ían a deter". "Eu sempre dixen: 'se en helicóptero'. Ían vir por terra mar e aire", afirmou para subliñar que o asunto está "arquivado non por un xuíz", senón pola Audiencia, "que son 3". 

"Todos vostedes que me acusaron, que pedían a miña dimisión, que me chamaron de todo, que me inxuriaron e resulta que agora o arquivan", manifestou nun pleno o que tamén se dirixiu aos portavoces do BNG e do PSOE para preguntarlles polo que tiñan que dicir respecto diso tras facer "sentenza".