Récord de novos casos covid en máis de mes e medio en Galicia debido a fortes alzas na Coruña e Ourense

Os 76  novos positivos por PCR comunicados hoxe trucan a freada da tendencia á alza que sufrimos desde mediados de outubro. De feito, é a peor cifra en máis de mes e medio.

Os casos activos dan un salto dun calibre inédito desde o pico da quinta onda, cun preocupante +48, procedente sobre todo dos concellos da Coruña e o veciño Oleiros. Nun só día creceron case un 10%.

A alza tamén pode ter que ver co descubrimento de brotes en xubilados de Ourense pero tamén entre a comunidade escolar, un deles en Oleiros. Mozos e maiores son os dous tramos de idade cunha maior incidencia.

A incidencia acumulada semanal crece tres puntos e sobe ata 11,3 positivos epor 100.000 galegos.  É o peor dato desde finais de setembro. Xa non seguimos en nova normalidade segundo a escala deste indicador no semáforo oficial de alertas, ao superar a barreira de 10. Entramos en risco baixo, en amarelo na gráfica. 

A incidencia acumulada a 14 días tamén crece case tres puntos tras varios días de ascensos moi tímidos e sitúase en 19,5. Outro par de días con ascensos de leste calibre e perderemos a nova normalidade. O risco baixo empeza en 25. 

O dobre da incidencia a 7 días (22,6) é maior que a incidencia a 14 días (19,5). Sabemos pois que na última semana houbo máis positivos que na penúltima. Cantos positivos máis? A razón de taxas é de 1,16, por tanto un 16% de positivos más, o que supón un incremento importante fronte á cifra de onte pero é similar á dos días precedentes.  

A taxa de positividade onte foi do 1,6 % e axúdanos a mantervos  en nova normalidade porque a media semanal segue por baixo de 4%. Iso si, volve crecer ata situarse por encima do 2%. Este índice tamén mellorara nas últimas xornadas.

EVOLUCIÓN DOS CASOS ACTIVOS

O total de infectados ascende hoxe un +9 %. En termos porcentuais, é o maior incremento desde mediados de xullo. Loxicamente, ante tal dato hoxe, a media semanal dá un paso na mala dirección e sobe de +1,7 % a +2,9%. 

Son xa dez días seguidos nos que a tendencia semanal, a máis relevante para estudar a pandemia, é á alza. Con todo, no últimas cinco xornadas controlouse o ascenso primeiro e empezado un relevante descenso despois. Un escenario optimista que liquidaron cos pésimos datos de hoxe.

En termos absolutos, as porcentaxes de hoxe equivalen a un ascenso de +48 . O total é de 581 casos activos.

DATOS POR ÁREAS

 A Coruña (31) e  Ourense (14) son os distritos que máis positivos comunican hoxe.  A cifra de Ourense non sorprende-o SERGAS informou onte de brotes entre xubilados ourensáns en viaxes do Inmerso- pero si a cifra coruñesa. Hai moitas semanas que unha área non superaba os 30 positivos. 

O ascenso de casos activos no distrito herculino débese sobre todo a aumento do cómputo de positivos semanais na Coruña cidade (+12) e Oleiros (+8). En Oleiros o SERGAS informou onte dun brote nun CEIP pero na capital non hai comunicación oficial de brote algún ata o de agora.

Máis datos a nivel municipal e de distrito do SERGAS en a noticia diaria do covid a nivel local Galiciapress.  

CONCLUSIÓNS

Con estas cifras sobre a mesa, pódese inferir que:

• Os excelentes datos da pandemia que mantiñamos ata o de agora sofren hoxe un duro revés. Perdemos outra vez a nova normalidade na incidencia semanal e como sigamos como hoxe imos camiño de perdela pronto na incidencia bisemanal.
• A clave é ese "como sigamos como hoxe". Son as cifras deste xoves algo excepcional? Estatisticamente sono, sen dúbida, pois nos últimos días os datos tendían á calma ou á baixa. 
• Agora ben, nas semanas previas a esta pequena melloría post-puete dominou unha leve tendencia á alza, en ningún caso tan virulenta como o impacto de hoxe. Unha posible explicación a estes excepcionalmente altos datos é que saltasen moitos positivos en cribados escolares ou de residencias, completados tras a ponte de Todos os Santos. 
• O problema é que isto é só unha hipótese. A maior opacidade do SERGAS -que deixou de informar a diario de todos os positivos en todos os colexios e residencias- impide avaliar se estamos ante algo excepcional debido a dous brotes en escolas ou residencias da Coruña ou Oleiros ou ante un brusco e perigoso cambio de tendencia. 

•