A quinta onda lastra a chegada de turistas foráneos pero aínda así Santiago rolda o 70% de ocupación
O concelleiro Sindo Guinarte, alcalde en funcións de Santiago, constatou este luns que a pandemia está a dificultar a recuperación do turismo internacional e incidiu en que, cunha quinta onda de especial virulencia, os datos turísticos e de ocupación na capital galega son "aceptables", pero "non óptimos".
Aínda queda case un mes de tempada turística, pero o balance que presentará a capital do Xacobeo será positivo, cunhas prazas que, sen as multitudes doutros anos, si están a rebordar de turistas e peregrinos, sobre todo españois.
Gumersindo Guinarte é o responsable de turismo de Compostela
Segundo concretou e na liña coas cifras ofrecidas polo sector, en xullo a ocupación roldou aproximiadamente un 60% e en agosto a previsión é que se alcance o 70%. Sendo mellores que o ano pasado, precisou que aínda non se axustan aos de "unha tempada normal".
Finalmente, reivindicou que a capital galega "segue sendo un destino seguro" e deu por feito que, se se rexistra unha mellora da situación sanitaria, as cifras de ocupación para setembro serían "máis positivas".
Santiago é unha das tres urbes galegas que non está en risco máximo. A tendencia en Compostela é á baixa, cunha razón de taxas de 0,80%. É dicir, na última semana houbo un 20% menos de positivos (169) que na penúltima (251).
Escribe o teu comentario