Así é o novo Opel Combo-e Life con ata 280 quilómetros e producido na fábrica de Stellantis Vigo

O prezo mínimo de partida anda polos 36.500 euros, que se pode reducir moito, máis dun 40%, ata quedar en 21.700, con todos os descontos do plan de axudas estatal MOVES III

O novo modelo é a furgoneta eléctrica máis pequena de Opel e supón un paso máis na ofensiva de PSA por dominar o mercado das furgonetas enchufables.

A compañía automobilística alemá Opel xa admite pedidos en España do novo Opel Combo-e Life, que se fabrica na planta que o grupo Stellantis (fusión de PSA e FCA) ten en Vigo e dispón de ata 280 quilómetros de autonomía 'cero emisións' cunha soa carga.

CARACTERÍSTICAS TÉCNICAS
Dispoñible con carrocería curta ou longa, de 4,40 e 4,75 metros, respectivamente, o novo Combo-e Life ofrécese con cinco ou sete prazas. Ademais, pode ter unha ou dúas portas laterais correderas.

O modelo máis curto con cinco prazas conta con 597 litros de capacidade de maleteiro, mentres que a versión máis longa alcanza os 850 litros. Cos asentos traseiros abatidos, o volume sobe aos 2.126 e 2.693 litros, respectivamente.

Cun motor eléctrico de 136 cabalos de potencia, a súa batería de ións de litio de 50 quilowatts hora (kWh) pode cargarse ao 80% nuns 30 minutos en puntos de carga rápidos. O vehículo dispón dunha autonomía de ata 280 quilómetros.

Así, o modelo acelera de 0 a 100 quilómetros por hora en 11,2 segundos, alcanzando unha velocidade máxima limitada electronicamente de 130 quilómetros por hora.

IRMÁNS ELÉCTRICOS
O novo 'español' Combo-e Life chegará aos concesionarios este inverno, uníndose á gama electrificada de Opel, que xa conta co Corsa-e, o Mokka-e, o Zafira-e Life e o Grandlad X híbrido enchufable.