A exposición NÓS

Se alguén busca algunha actividade para ocupar ben o seu tempo de lecer, podo e quero recomendarlles que pasen a visitar a exposición titulada “De NÓS a nós”. Esta exposición está comisariada por Afonso Vázquez Monxardín, profesor e colaborador da Rexión, e continúa a viaxar por Galicia celebrando a efeméride dos 100 anos da revista NÓS. Porque cen anos non se cumpren todos os días, e como o “desastroso ano 2020” non era para festas nin celebracións, o recordo dos grandes das letras galegas continúa neste 2021. Podemos vela no Centro Cultural da Deputación de Ourense e na Sala da Fundación ABANCA na Praza Maior.

A primeira exposición de NÓS en Santiago, con 15.000 visitas, pouco tivo que ver coa que se nos presenta en Ourense. É necesario animar a todos os que xa a viron, a que repitan a experiencia. A razón non está en que en Ourense fagamos as cousas mellor ou peor, senón que en dous espazos próximos, pero ben diferenciados, observo moitas das pezas expostas anteriormente, nunha disposición, agora, máis idónea. En concreto son catro espazos amplos ben distribuídos e cheos de luz. O peor que che pode ocorrer nunha exposición é que che perdas dentro dela ou que che marches sen entender o tema que se presenta. Neste caso Afonso V. Monxardín tivo ben claro que os obxectos que contextualizan a época do nacemento da revista en Ourense non podían eclipsar o valor da revista nin a figura dos seus autores. Todo un éxito.

Na inauguración do día 24 de febreiro de 2021 houbo bos discursos por parte do presidente da Deputación e do presidente da Xunta da Galicia. Monxardín explicou e agradeceu as achegas de entidades públicas e de particulares e empregou os termos de excelentísimo, e ilustrísimo, (hoxe obsoletos), motivado quizas polos nervios do momento ou polo romanticismo dos anos 20. A quen non tivemos a oportunidade de escoitar foi ao alcalde de Ourense. Non pronunciou palabra, pois como maior autoridade alí presente, e para un acto cultural ao que asiste, ben podía solicitar dicir algo. Pero a presenza de numerosos invitados, entre eles colaboradores, entidades e fundacións, artistas, escritores e músicos, guiñaron un ollo a tantas en tantas ocasións nas que se conmemoran eventos desta importancia. Digo iso porque a organización fixo un esforzo para cumprir as normas sanitarias de seguridade e penso que o conseguiron. Por iso quero felicitar á Deputación de Ourense por esta exposición e animar a todos a que vaian varias veces para visitala ata o día 18 de abril. Tamén hai un catálogo da exposición con moita calidade e cun prezo razoable.

Investir en cultura é transformar a sociedade na que nos movemos. Segue sendo un potencial que ninguén debería desprezar e algúns non entenden.