O cribado da Limia conclúe a "intensa transmisión" existente en toda a comarca, di o SERGAS

O cribado, que destapou 70 casos positivos, lanza unha positividade do 2,5%.

Con estas cifras, a Xunta anunciou a suspensión de toda actividade non esencial e o peche de toda a hostalería Xinzo, ademais de en Arteixo e Viveiro. 

O Servizo Galego de Saúde (Sergas) constata unha "intensa transmisión" na comarca ourensá da Limia, tras detectar 70 novos positivos nun cribado realizado o sábado en Xinzo de Limia.

Segundo informa a área Sanitaria de Ourense-Verín-O Barco de Valdeorras, este cribado realizouse vía PCR a un total de 2.815 persoas dun total de 4.000 que foron citadas. Así, a participación roldou o 70,4%.

Os 70 positivos detectados implica que a taxa de positividade lanzada por estas probas en Xinzo foi do 2,5%, o que "revela unha alta incidencia e intensa transmisión do virus" na Limia, tal e como conclúe o Sergas.