Traballadores de Alu Ibérica piden ao Goberno que interveña a vella planta de Alcoa, á que chama "depredador industrial"

Os empregados critican ás administracións públicas a súa "desaparición" ante o incerto futuro das plantas da Coruña e Avilés, anterioremente en mans de Alcoa, e a de San Cibrao, aínda en mans dos estadounidenses. 

Desde o comité de empresa manifestan que seguirán coas mobilizacións "o tempo que faga falta" e reclama solucións.

Traballadores da fábrica de Alu Ibérica na Coruña secundaron unha nova protesta ante as instalacións para esixir a intervención da planta e para instar tanto o Goberno central como autonómico á procura dunha "solución".

En declaracións a Europa Press, o presidente do comité de empresa, Juan Carlos López Corbacho, manifestou que seguirán mobilizándose "o tempo que faga falta". "O Goberno e a Xunta están desaparecidos", dixo tras insistir en que os seus prognósticos sobre Alcoa e a venda das fábricas "materializáronse".

"Alcoa é un depredador industrial", engadiu en alusión tamén á fábrica de San Cibrao (Lugo) e en referencia á venda das plantas coruñesa e asturiana por parte da multinacional. "O Ministerio ten que entrar, intervir Lugo, A Coruña e Avilés", reiterou.

Por outra banda, avanzou que solicitarán unha reunión co conselleiro de Economía e vicepresidente segundo, Francisco Conde, e tamén co delegado do Goberno en Galicia, Javier Losada. "Queren deixar un deserto industrial", dixo sobre a situación do sector e a situación destas fábricas.