A Xunta valora o ofrecemento de Pedro Sánchez para usar militares como rastreadores durante a crise sanitaria
O Goberno galego está interesado no reforzo de rastreadores de casos da Covid-19 con militares anunciado polo xefe do Executivo central, o socialista Pedro Sánchez, e dirixiuse ao Ministerio de Sanidade para concretar os termos da oferta.
"Mostrámonos interesados, dirixímonos ao Ministerio de Defensa e agora estamos pendentes de concreción", trasladaron fontes da Consellería de Sanidade consultadas por Europa Press. Entre as cuestións que habería que ratificar estarían o número de efectivos e cando se producirían as incorporacións.
Sánchez sinalou este martes que no marco da loita por dobregar a curva de contagios de coronavirus pon ao dispor das Comunidades Autónomas os 2.000 efectivos do Exército para que realicen labores de rastrexo.
Na comparecencia institucional que realiza desde o Palacio da Moncloa tras celebrar o Consello de Ministros, Sánchez anunciou que levarán a cabo varias medidas para reforzar o traballo da loita contra a pandemia respectando que as comunidades autónomas son as que deben xestionar en cada territorio a situación.
"Hai 2.000 militares ao dispor das CCAA, sobre todo de quen teña mais dificultades, e ese número poderíase aumentar", apuntou para logo lembrar que puxo a disposición un 'fondo Covid' de 16.000 millóns de euros para as comunidades para reforzar a loita contra o virus.
Escribe o teu comentario