Sindicatos pedirán de forma conxunta este xoves o cesamento da conselleira Fabiola García

As catro organizacións sindicais máis representativas na Administración da Xunta (CIG, CC.OO., CSIF e UXT) avanzaron que este xoves escenificarán "un novo acto de protesta" no Complexo Administrativo de San Caetano no que pedirán o "cesamento" da conselleira de Política Social en funcións, Fabiola García.

A conselleira de Política Social Fabiola García

Segundo indican nun comunicado, farano ante "a negativa" da conselleira a recibir aos representantes do persoal, así como para informar das protestas que manteñen todos os xoves desde o pasado 8 de maio.

O que esixen os sindicatos é a apertura dunha mesa de negociación para "tratar exclusivamente a recuperación dos dereitos recortados desde o ano 2012 ao persoal de centros de servizos sociais que dependen do departamento autonómico".