Volven subir os casos de coronavirus en Vigo e Santiago, estabilidade no resto de áreas sanitarias de Galicia

A pesar de que Galicia logrou luz verde de Moncloa para pasar á fase 1 este luns, os datos do SERGAS seguen sendo algo preocupantes nalgunhas áreas, que continúan retrocedendo un pouco no lento camiño cara á normalidade.

Vigo suma xa varios días de subidas e baixadas, aínda que fontes do SERGAS consultadas por este medio achacan os altibaixos desta semana a un "problema informático" que, aínda que dicían ter localizado, aínda segue reflectíndose nas cifras oficiais. 

Mentres, en Santiago de Compostela a gráfica mostra tamén certo repunte recente, con 30 novos casos nas últimas 24 horas. Compostela ten hoxe máis casos activos que hai 9 días, o 30 de abril. 

QUE É UN CASO ACTIVO?

Hai que lembrar que estas gráficas aliméntanse dos "casos activos" que cada día publica a web do SERGAS. Que é un caso activo? Unha persoa que deu positivo de coronavirus na proba PCR e que non superou a infección nin faleceu. Por tanto, hai tres factores que inflúen neste parámetro: os casos confirmados por PCR, as curacións e as mortes. Se dun día a outro soben os casos activos, implica que se detectaron máis contagios que a suma de altas e decesos.

A situación na área da capital, que viña ofrecendo unha baixada progresiva ata o martes, preocupa tanto ou máis como o escenario da área da cidade olívica, aínda que esta só viu aumentada a súa cifra en once novos positivos no último día. 

Na área segue pesando moito o  gran salto sufrido o mércores, que la EOXI de Vigo encargouse de desmentir asegurando que se debían a falsos positivos. 

Con todo o certo é que tres xornadas despois de o desmentido dos seus propios datos-que se fixo verbalmente a Galiciapress e outros medios- o SERGAS segue sen corrixir as súas cifras publicadas para Vigo, o que non suscita confianza precisamente, pois en teoría era simplemente un "erro informático".

Pontevedra é a terceira área que hoxe ofrece malos datos ao aumentar os casos activos, moi lixeiro iso si. Son cinco positivos máis con respecto a onte. 

ÁREAS CON MENOS PROBLEMAS

O resto de áreas galegas si parecen mellorar. A Coruña viu corrixido o repunte que sufriu onte, e hoxe rebaixa unha quincena de casos. 

Mentres, a área de Ourense rebaixa a súa cifra en seis positivos menos. Ferrol, pola súa banda, decrece en tres casos nas últimas 24 horas. 

Tanto a área auriense como a da cidade departamental han mantido un descenso constante desde o 29 de abril, momento no que a Xunta comezou a aplicar a súa nova metodoloxía. Ata o de agora non sufriron nin un só repunte. Lugo, en cambio, si viu aumentadas as súas cifras os días 4 e 7 de maio, aínda que foron case testemuñais, repuntes dun e catro casos e hoxe perdeu un positivo nas súas cifras con respecto a onte. 

O 28 DE ABRIL A Xunta CAMBIOU A FORMA DE CONTAR

As gráficas por áreas sanitarias de Galiciapress só mostran datos desde o 29 de abril. O 28 de abril o SERGAS cambiou a súa forma de contar, o que fai incomparables as cifras de antes e despois. 

Con todo, velaquí a gráfica por áreas ata ese 28 de abril que a Xunta aplicou a metodoloxía que marca o Ministerio e que xa aplicaban o resto de autonomías:

O número de casos activos de coronavirus en Galicia este sábado 9 de maio é de 2.758. Por áreas sanitarias, 650 pertencen á área de A Coruña, 166 de Lugo, 426 de Ourense, 147 de Pontevedra, 753 de Vigo, 500 de Santiago e 115 de Ferrol, segundo as cifras do SERGAS.