A ONCE traslada aos seus vendedores a suspensión das vendas en toda Galicia

A Organización Nacional de Cegos Españois (ONCE) trasladou a todos os seus vendedores en Galicia a decisión de suspender as vendas dos seus produtos de lotería tras a declaración de emerxencia sanitaria por parte da Xunta este venres.

En concreto, a mensaxe dada é o seguinte: "Informámoslle que debido á restrición de actividades comerciais e doutro tipo que afectan o ámbito no que se desenvolve o seu traballo, adoptadas pola Consellería de Sanidade da Xunta de Galicia, queda suspendida a venda de produtos ONCE desde hoxe e ata nova orde, na totalidade dos puntos de venda autorizados desta Comunidade".

Así, a organización asegura que "seguirá atenta ás decisións das autoridades de todos os ámbitos" e garante que acometerá "cantas medidas sexan precisas para garantir a máxima seguridade posible" dos seus vendedores.

Con todo, a ONCE lembra a todos os cidadáns e clientes que poden seguir apoiando o seu labor social a través da páxina web de 'JuegosONCE'.