Un cabalo cóase na A-6 nas Nogais e provoca un grave accidente a unha familia que viaxaba cun bebé

Como ou por onde puido chegar un cabalo ao medio da autovía A-6, ao seu paso polo municipio lucense das Nogais, é o que tentan pescudar as autoridades, alertadas por un feito que puido custar unha tremenda desgraza ao ter lugar un grave accidente de tráfico ao impactar un vehículo contra o equino na noite do martes.

SUCESOS

Os feitos ocorreron ao redor das 23:10 horas no quilómetro 444 da vía, ao seu paso pola parroquia de Doncos, no termo municipal das Nogais. Un turismo chocou contra o animal, deixando ferido grave ao condutor do vehículo.

Dentro do coche viaxaban, xunto co piloto, unha muller e un bebé. Afortunadamente, estes dous ocupantes resultaron ilesos e nin sequera necesitaron traslado sanitario. Foi o sistema automático eCall do vehículo o que deu a voz de alarma ao 112 Galicia. 

Desde a central non puideron establecer comunicación cos ocupantes do turismo a través do dispositivo, pero as chamadas de varios particulares pouco despois confirmaron a alerta. Axentes da Garda Civil de Tráfico, efectivos dos Bombeiros de Sarria e persoal de Urxencias Sanitarias de Galicia-061 trasladáronse ao lugar para atender ao ferido grave.