O alcalde socialista de Vilamartín de Valdeorras, Enrique Álvarez, dimite
O alcalde de Vilamartín de Valdeorras (Ourense), Enrique Álvarez Barreiro, anunciou este xoves no pleno municipal a súa intención de renunciar ao cargo tras máis dunha década como rexedor desta localidade.
Álvarez Barreiro explicou que, por "motivos de índole estritamente persoal", presenta a súa renuncia "voluntaria e formar" como alcalde deste municipio.
O rexedor trasladou o seu "máis sincero agradecemento" aos veciños e veciñas, á corporación municipal e a todo o persoal do concello polo apoio e o traballo conxunto ao longo da súa etapa á fronte do Consistorio.
Visiblemente emocionado, recoñeceu que é un momento "difícil" para el, que lle "custa" tras 15 anos dedicados ao Concello. "Pero a familia neste momento requíreme", afirmou.
Enrique Álvarez Barreiro (Folgoso do Courel, 1964), encabezou en 2011 a candidatura do PSdeG á alcaldía de Vilamartín de Valdeorras e foi elixido alcalde como candidato da lista máis votada, a primeira vez na democracia que o PSOE alcazaba o bastón de mando nesta localidade.
O 21 de xaneiro de 2013 perdeu a alcaldía que tras unha moción de censura impulsada pola súa predecesora no cargo, María Jesusa Candal, candidata do PPdeG. Con todo, nas municipais de 2015 volveu presentarse e logrou a primeira das súas tres maiorías absolutas --volvería alcanzala en 2019 e 2023--.
Fontes consultadas por Europa Press trasladaron que a tenente de alcalde e deputada provincial, Sherezade Núñez, asumirá previsiblemente a alcaldía.
Escribe o teu comentario