Abanca busca despedir 250 traballadores pola absorción de Caixa Geral

O sindicato CIG en Abanca alerta que "Abanca presentou un ERE pola integración de Banco Caixa Geral e Abanca que afecta a 250 traballadores". Galiciapress contactou coa filial de Banesco para contrastar esta denuncia, pero o banco declina por agora facer comentarios.

Unha pasada protesta de traballadores de Caixa Geral en Vigo

A central nacionalista empeza cun calendario de protestas. A primeira cita, mañá xoves ás dez horas, terá lugar na praza de Cervantes, en Santiago de Compostela. Alí ten Afundación, a ONG gobernada por ABANCA, unha das súas sedes na capital.

O lema da protesta será “Nin despedimentos, nin abusos en materia de xornada”. E é que hai tempo que CIG-Abanca vén queixándose da sobrecarga de traballo nas oficinas das que foron as caixas de aforro. 

Este diario consultou a ABANCA se os despedimentos poden afectar só os operarios do banco de orixe portuguesa, ou tamén aos das oficinas de ABANCA, sen recibir resposta.

Abanca e Caixa Geral de Depósitos (CGD) pecharon o outubro a adquisición.  Banesco pagou pola rama española do banco luso 384 millóns de euros, 20 máis do previsto inicialmente ao anunciar a operación en 2018, "porque é un banco moi ben capitalizado, o que xustifica que a cifra resultase maior". 

Banco Caixa Geral -suma á súa vez da fusión do Banco Luso Español, Banco Estremadura e Banco Simeón- tivo beneficio neto do banco de 25,4 millóns de euros en 2017 , segundo os seus representantes sindicais.