Pacientes quéixanse á Valedora porque o SERGAS acumula enfermos nos corredores de urxencias

A Asociación de Pacientes do Complexo Hospitalario Universitario de Santiago (CHUS) remitiu unha protesta formal contra o SERGAS na o Valedor do Pobo. O organismo que vela polo bo funcionamento da Administración terá que investigar porque se repiten as imaxes de enfermos en padiola e cadeira de rodas  esperando nos corredores de urxencias a ver un médico, tras ser clasificados polos enfermeiros.

Pacientes e familiares nos corredores de urxencias

En opinión deste colectivo, a Xunta vulnera a dignidade dos pacientes que esperan, ás veces durante horas, nos corredores, sen intimidade algunha xusto cando están mais vulnerables. A Asociación lémbralle á valedora que un ancián morreu o 30 de xaneiro en urxencias tras pasar máis dunha hora nunha padiola nun corredor, suceso que está a investigar tamén a Fiscalía.

O SERGAS sempre defendeu que as imaxes de corredores con longas colas de enfermos esperando en padiolas e cadeiras de roda non poden servir para cualificar o funcionamento xeral do servizo de urxencias do CHUS. Razoa tamén que todos os que acoden son clasificados segundo a súa gravidade aos poucos minutos de chegar ao CHUS, no triaje.  A Xunta, que contratou máis persoal para a época de gripe, defende o bo funcionamento das urxencias, das que publica datos día a día.