A enquisa da Voz, que borra a Vox e Cs mapa, debuxa o panorama perfecto para que Feijóo repita

Alguén se equivoca, ou o CIS ou Sondaxe. Mentres o instituto estatal leva moitos meses poñendo ao PSdeG con bastante vantaxe sobre PP en Galicia, a empresa do grupo Voz publica unha enquisa que sitúa aos conservadores doce puntos por encima deses socialistas, cos que os de Feijóo empataron tecnicamente nas xerais de hai dous meses e medio.

Así, o PP sería o máis votado co 43% do voto (once puntos máis do que lle dá o CIS e dos que sacaron nas xerais), o que lle permitiría sumar xusto os 38 escanos da absoluta. Son, en todo caso tres menos dos que ten agora.

Imaxe sobre a enquisa publicada pola CRTVG

O PSOE subiría de 14 a 18 deputados en O Horreo, sumando o 21,3%. O último CIS outorgáballe un 28,4%.  Clara vantaxe sobre o terceiro, que xa non sería a confluencia liderada por Podemos.

Os morados serían adiantados por un BNG moi ao alza. Os de Ana Pontón pasarían de 6 escanos a 11, case duplicando o seu voto ata o 14,5 por cento. Un avance enorme, pois nas xerais de novembro sacaron o 8,13% dos votos.

Unha hipotética alianza de Podemos, Esquerda Unida e Anova sumaría só 8 deputados, fronte aos 14 que tivo no seu día En Marea.

Por certo, a coalición de En Marea de Luís Villares non entraría no Parlamento pero si sacaría máis votos, por exemplo, que Vox. Algo moi sorprendente, pois nas últimas estatais Vox logrou case o 8% dos votos e En Marea nin se presentou, porque  nas anteriores de primavera só sacase o 1,1%

TODO SON BOAS NOTICIAS PARA O PPDEG

En definitiva, pola dereita, non lle dá opción algunha nin a Cidadáns (4,3 % nas últimas xerais) nin a Vox; o que coincide co discurso de Alberto Nuñez Feijóo, que leva meses argumentando que votarlles é favorecer á esquerda. O PP móstrase con moitas opcións de gobernar  outra vez con maioría absoluta; pero, iso si, carece de marxe de erro, o que pode contribuír a mobilizar ao seu electorado.

AS ESQUERDAS NON RENDIBILIZARÍAN O PACTO DE  MADRID

Pola esquerda, a alianza de socialistas e Podemos en Moncloa só reportaría réditos, e insuficientes, para o PSdeG de Gonzalo Caballero. Podemos en Galicia e as súas alianzas só conseguiría salvar 8 dos 14 deputados que tivo en Marea. 

Aproveitaríase disto un BNG en forte ascensión, incremento que xa está a enarborar o PP como estratexia para meter medo ao electorado de centro - dereitas. O seu discurso pasa por advertir que se non goberna o PPdeG, a Xunta quedaría en mans dunha coalición na que tería moito poder uns nacionalistas que seguen a estratexia independentista dos seus homólogos cataláns e vascos.