Usuarios do centro de saúde Novoa Santos de Ourense denuncian a "segregación" da Xunta sobre os pacientes

O groso dos usuarios do Centro de Saúde Novoa Santos da cidade de Ourense uniuse na loita común por unha solución para a súa situación, denunciando o "abandono" do SERGAS e o deseño dun plan de "segregación" no centro, sen que a Xunta conte ou falado cos pacientes afectados

CAMBIO DE LOCALIZACIÓN

Nun comunicado, a colectivo censura que a opacidade da administración galega ha conseguido que a información que teñen a disposición é aquela que lles chega polos medios de comunicación. A organización subliña a calidade do equipo humano de profesionais sanitarios do centro auriense, que atende a unhas 19.000 cartillas que, agora, terán que desprazar a outro emprazamento "con máis ou menos (in)comodidades", segundo rezan na súa nota.

"Esa segregación o único que vai lograr é romper todo canto nós eliximos voluntariamente, romper unha dinámica de saúde, sen ter en conta a opinión de ninguén, nin pacientes nin de profesionais", critican os usuarios, que ante as obras que se realizarán nesta infraestrutura, terán que ser derivados a outros centros, polo menos de maneira provisional. Tamén os propios sanitarios demandaron á xerencia coñecer os pormenores deste proxecto, xa que temen que estes cambios poidan afectar tamén ao desempeño da súa profesión e un cambio nas súas condicións laborais.

ALTERNATIVAS?

Os afectados recalcan a "crueldade" que supón esta medida para moitos enfermos, gran parte deles derivados ao Centro de Especialidades, mentres que outros terán que acudir ao Centro de Saúde do Couto, moito máis incómodo polas distancias e outros inconvenientes como o aparcadoiro ou o servizo de transporte público. 

"Estudáronse outras posibles alternativas? Cales? Por que se refugaron?", cuestiona o colectivo, que non considera un avance a proposta de levantar un novo edicio no centro da cidade que "invadirá un espazo vital" para moitos veciños, estimando en que as obras, ademais, seguen pendentes de prazos e cunhas estimacións que poderían alcanzar un lustro, algo que complicará a vida diaria de moitos enfermos crónicos.

Por todo isto, desde o colectivo demandan á Xunta unha mellor "planificación" e concentrar tanto a atención aos desprazados, tanto usuarios como profesionais, nun único centro e propoñen habilitar os antigos xulgados para ese fin, conscientes de que isto podería provocar "guerras" entre departamentos. 

Outra alternativa sería "a superficie existente na esquina das rúas Diagonal e Concello,
onde antigamente estivera Mutualidades Laborais e parte do INSS". "As persoas necesitamos poder ser consultadas en lugares habilitados para iso, non en calquera espazo e sen pensar outras opcións. Por iso insistimos na opción de habilitar espazos na CE e manter a todo o mundo preto do actual Novoa Santos", reiteran, á vez que cargan contra a Xunta por licitar a derriba das instalacións antes das obras e se isto pode estar condicionado por presuntos problemas estruturais no edificio.