Galicia no centro do Goberno

O Goberno de progreso que vai formarse nos próximos días vai ter un carácter histórico porque será o primeiro Executivo de coalición que desde a II República nace froito do diálogo, a negociación e o acordo. Por primeira vez en case noventa anos, un pacto entre distintos partidos aluma un Consello de Ministras que reflicte directamente a pluralidade da sociedade española e do seu corpo electoral, e que pon ás maiorías sociais no centro da política. Pero ademais, e debemos subliñalo, este acordo de Goberno tamén é histórico porque por primeira vez en 40 anos de democracia, Galicia, coas súas necesidades, demandas e intereses colectivos, sitúase como eixo transversal da acción política do Estado.

O documento asinado o pasado 30 de decembro polo PSOE e polo Grupo Confederal de Unidas Podemos-En Común Podem-Galicia En Común, está na base deste acontecemento. En boa medida é o resultado do traballo do equipo negociador de Galicia En Común, e de feito baséase no programa electoral co que nos presentamos ás dúas últimas eleccións xerais. Aválannos os preto de 190.000 votos que a nosa coalición, consolidada como a terceira forza política do país tras o PP e o PSOE e referencia do espazo progresista de Galicia, obtivo hai apenas dous meses.

Detallar as medidas concretas que contempla o noso acordo de Goberno co PSOE resulta fundamentalmente útil por dúas cousas. En primeiro lugar, para poñer de manifesto a relevancia de Galicia en Común como actor fundamental na negociación dunha saída política á parálise e a transitoriedad que caracterizaron a axenda política dos últimos meses. En segundo termo, porque esas medidas representan un compromiso firme coa cidadanía galega, que debe esixirnos o seu cumprimento e aplicación o máis axiña posible e na medida en que a dinámica parlamentaria nolo permita.

O Goberno que formamos comprometeuse a executar demandas recorrentes das galegas. Entre elas a transferencia da titularidade da AP-9, e o saneamento integral das rías, xunto á posta en marcha dunha estratexia que supedite a xestión dos recursos naturais á protección da riqueza ecolóxica de Galicia e á loita contra as consecuencias do cambio climático. Tamén a recuperación para o patrimonio público de todos os galegos dos bens roubados por Franco e a súa familia, empezando polo Pazo de Meirás. Son algúns dos puntos concretos do acordo, pero non os únicos, nin os máis destacados.

Este Goberno vai fomentar unha política de infraestruturas en rede, e non radial, como a que precisa Galicia. Estará dirixida a promover a conexión interterritorial, aumentando o investimento no ferrocarril de proximidade, e a culminar o corredor ferroviario atlántico. Trátase de garantir a accesibilidade e conectividade territorial, que todas as poboacións, sexa cal for o seu tamaño, conte cun servizo de transporte público terrestre que as comunique coa cabeceira da comarca.

Este Executivo tamén se comprometeu coa defensa dos traballadores de todos os sectores produtivos de Galicia, con estratexias específicas. Elaboraremos unha lei de titularidade compartida de explotacións agrarias e sumaremos a España ao Convenio 188 da Organización Internacional do Traballo, que permitirá a 18.000 persoas que viven do sector pesqueiro galego ver melloradas as súas condicións e remuneracións. Ademais, protexeremos o tecido industrial e ás familias que dependen del, actuando de forma efectiva contra as deslocalizacións e implantando medidas como o Estatuto do Consumidor Electrointensivo, que garantirá a competitividade e viabilidade de empresas como Alcoa. Aprobaremos un Plan de Reforma do Sistema Eléctrico, que favorecerá unha transición sen custos sociais cara á descarbonización, e poñeremos en marcha plans específicos de acción urxente para que comarcas e municipios como As Pontes, afectados polo peche de centrais de carbón, non vexan comprometido o seu futuro pola imprevisión e deixamento de Gobernos anteriores.

O acordo de Unidas Podemos-En Comú Podem-Galicia en Común contempla tamén políticas esenciais para recuperar a xustiza social no noso país: subir o salario mínimo interprofesional (SMI), para dignificar as rendas de centenares de miles de traballadores galegos, e non só dos máis novos, que adoitan sufrir os salarios máis precarios –en Galicia o soldo medio anual está máis de 600 euros por baixo da media estatal-, senón de todos aqueles acollidos a convenios colectivos que referencian as súas retribucións ao SMI. O pacto tamén prevé a derrogación da reforma laboral do Partido Popular, que dinamitou o mercado de traballo depauperando as condicións de vida de miles de familias, abaratando o despedimento e facilitando os despedimentos masivos e colectivos en empresas de todo tipo. O noso país é un claro exemplo desa estratexia antiempleo: Galicia ten hoxe 63.000 traballadores menos que no ano 2012, cando o PP de Alberto Núñez Feijóo aprobou a reforma laboral.

O noso acordo planexa unha reformulación da Seguridade Social que vinculará a subida das pensións ao índice de prezos ao consumo, e que elevará a contía das máis baixas. De novo unha medida vital para Galicia, a segunda comunidade coas pensións máis exiguas do Estado e que conta con máis de 800.000 perceptores desas rendas.

Recuperar os dereitos das familias traballadoras de Galicia tras máis dunha década de degradación implacable do seu nivel de vida, é unha prioridade básica de calquera estratexia de Goberno que persiga a xustiza e a equidade social. Pero non a única. Pretendemos laminar calquera expresión ou intento de expresión machista do noso país, e farémolo porque nos comprometemos a aplicar, desenvolver e dotar de recursos todas as medidas pendentes do Pacto contra a Violencia de Xénero, poñendo en marcha un Plan Integral de Compensación, Reparación e Recuperación da Autonomía para mulleres que padecen esta violencia, así como unha Lei integral pola protección da liberdade sexual e contra as violencias sexuais, que garanta que o consentimento da vítima sexa clave na determinación penal dos delitos sexuais.

Derrogaremos a Lei Mordaza e recuperaremos para a cidadanía a garantía do exercicio pleno das liberdades de expresión e reunión; e aprobaremos un Lei Básica de Educación que blindará á educación pública como eixo vertebrador do sistema educativo, eliminando do sistema público e concertado a segregación escolar polas condicións de orixe dos estudantes, polas súas necesidades educativas ou polo seu sexo.

Damos a benvida ás forzas que a el sumáronse para permitir a conformación deste Goberno. Un Goberno que pon a Galicia e ás súas maiorías sociais no eixo central da súa estratexia, á que pretendemos dar continuidade co cambio político que xa emprendeu este país e que desembocará no resultado das próximas eleccións autonómicas. O tempo da política baseada na destrución do común terminouse.  

Tamén deixamos por escrito o noso compromiso escrito coa nosa lingua, e por tanto, co apoio, o fomento e o impulso da produción e distribución das creacións artísticas e culturais en galego.

As anteriores, insisto, son só algunhas das medidas comprometidas no acordo que asinamos o pasado 30 de decembro. Damos a benvida ás forzas que a el sumáronse para permitir a conformación deste Goberno. Un Goberno que pon a Galicia e ás súas maiorías sociais no eixo central da súa estratexia, á que pretendemos dar continuidade co cambio político que xa emprendeu este país e que desembocará no resultado das próximas eleccións autonómicas. O tempo da política baseada na destrución do común terminouse. E Galicia vai estar no centro desta nova etapa.

Gómez Reino coa tamén deputada de En Común Yolanda Díaz o día da investidura de Pedro Sánchez no Congreso