Voluntarios da Caixa limpan de lixo os areais de Riazor e Orzán

O grupo de voluntarios retirou plásticos e residuos das praias da Coruña na maior xornada de recollida de residuos da historia, xunto coa asociación Mar de fábula.

Voluntarios da Caixa

No Día Mundial da Limpeza de Praias os voluntarios da Caixa na Coruña limparon de residuos as praias herculinas de Riazor e Orzán, en colaboración coa asociación Mar de fábula e participando así no movemento 'World CleanUp Day' que ten como fin concienciar e 'erradicar os residuos do noso planeta'.

Os voluntarios peitearon os areais librando a zona de residuos cos que encheron dúas bolsas de grandes dimensións. Plásticos, luvas, botellas ou chanclas son algúns dos obxectos que quedan na praia e ensucian os areais, ademais de acabar no mar en moitas ocasións e ser prexudiciais para o medio ambiente.

Ademais, unha parte dos elementos recolleitos poden ser reutilizados ou reciclados polos propios voluntarios. Así, obxectos como cordas ou tapóns gárdanse para usarse en manualidades ou para ser reconvertidos en obras de arte.

"No que vai de ano, 110 voluntarios da Caixa participaron en Galicia en 71 actividades solidarias, chegando a un total de 4.500 persoas", sinalan desde a organización do proxecto de voluntarios, formado por empregados en activo, xubilados e prexubilados da entidade, así como amigos, familiares e clientes, que cumpriu o seu undécimo aniversario de labor solidario.