Vixiantes de seguridade esixen a rescisión das tres contratas do SERGAS con EME Seguridade

O hospital do SERGAS en Verín, o hospital do SERGAS en Valdeorras e a central da Axencia de Doazón de Órganos de e Sangue en Santiago de Compostela. Estes son algúns dos clientes do sector público de EME Seguridade en Galicia, segundo fontes da Federación de Traballadores da Seguridade Privada consultadas por Galiciapress. Unha compañía que arrastra problemas de liquidez  e denuncias por falta de pagamentos aos seus empregados. 

O sindicato FTSP-USO advertiu hoxe que "a rescisión de contratos por parte dos clientes e a súa adxudicación a outras empresas solventes" é a "única solución viable para os traballadores". A central adianta que EME Seguridade anunciará pronto a súa "inviabilidade financeira". 

Vixiante de seguridade do Grupo EME nunha foto da web do sindicato FTSP USO

Aínda que a compañía ten maior presencia en Andalucía, Madrid e Comunidade Valenciana, en Galicia tamén está presente con "máis de 100 traballadores". Ademais das administracións sanitarias citadas, traballaría para INTASA, a empresa de fabricación de taboleiros pertencente ao grupo Tojeiro - Gadisa, ubicada en San Sadurniño.

Desde a FTSP-USO  din que xa esbozan "accións xudiciais e sindicais necesarias para en defensa dos dereitos do persoal de EME, mesmo contra os clientes que amparen estas prácticas empresariais e non rescindan os seus contratos".

TRABALLANDO Á MARXE DO CONVENIO

A maior central sindical no ámbito dos vixiantes de seguridade no Estado compara a situación de EME Seguridade coa de Ombuds, que tamén arrastra un delicado conflito laboral por falta de pagamentos. FTSP-USO táchaas de "empresas pirata", pois traballan á marxe do convenio estatal, con convenio propio, rebaixando a miúdo as condicións laborais e obtendo así unha vantaxe competitivo que lles permitiu no seu día conquistar mercado gañando concursos públicos ao presentar ofertas fose do alcance de as empresas que traballan adheridas ao convenio estatal.

O grupo EME, con sede en Madrid, non respondeu por agora publicamente ás acusacións do sindicato. UXT denunciou hai semanas á compañía e á súa filial Mantrol ante Inspección de Traballo  de  Alava, Bizkaia e Gipuzkoa.