​O Concello de Ourense pode provocar que o FITO baixe o pano despois dunha década de teatro

|

Galiciapress contacta coa compañía teatral ‘Sarabela Teatro’, organizadora do Festival Internacional de Teatro de Ourense que sen o financiamento do goberno municipal non ten garantida a súa continuidade. Os organizadores néganse a levar o festival lonxe da cidade termal, pero sen os recursos económicos necesarios, o evento se debate entre unha reestruturación forzada ou a súa clausura.


Sarabela teatro

Representación teatral de Sarabela Teatro | Foto: Sarabela Teatro


O Festival Internacional de Teatro de Ourense acumula xa 11 edicións no seu haber e a el acoden algunhas das compañías de teatro profesionais máis prestixiosas e recoñecidas do panorama internacional. “‘Ofin Teatret’ de Dinamarca, ‘Companhia Joao Gacía’ de Portugal, ‘Daniele Veronese’ e ‘Patrón Vázquez’ de Arxentina, ‘Tascabile’ de Italia, ‘Jo Stromgren Kompani’ de Noruega…”, citan desde a organización dun festival “dirixido ao público adulto” pero con espectáculos rueiros “para todos os públicos”.


SEN GARANTÍAS DE CONTINUIDADE

Con todo, despois de máis dunha década levando o teatro á cidade de Ourense, a continuidade do festival está en dúbida. A negativa do Concello de Ourense a seguir financiando o FITO deixa ao evento nunha situación idéntica á de o Festival Internacional de Música Clásica Pórtico do Paraíso, ao que o consistorio auriense tamén pechou a billa. Na súa última edición, o goberno ourensán achegou máis de 40.000 euros ao festival, unha achega que dobra á da Deputación de Ourense, que apoiou o evento con 20.000 euros.


Coa axuda da Deputación e a de AGADIC (Axencia Galega das Industrias Culturais) resulta moi difícil”, lamentan desde FITO en alusión á hipotética continuidade dun festival de carácter internacional que conta case exclusivamente con apoio das administracións, ademais de AGADIC e a Universidade de Vigo.


Aínda que este é o primeiro ano no que o goberno ourensán dá as costas ao festival, desde Sarabela Teatro confirman que xa desde o principio atopáronse problemas e que ano a ano íanse sucedendo os recortes.  “Desde a aparición da nova Lei de Contratación nas administracións públicas temos problemas burocráticos”, admiten, aínda que puntualizan que esas trabas “sempre se acabaron resolvendo”.


UNHA MORTE ANUNCIADA

Como ao resto de festivais vetados por Democracia Ourensá, ao FITO a morte chegoulle con reunións entre bambalinas. A organización reuniuse ata en cinco ocasiones co Concelleiro de Cultura e o alcalde Pérez Jácome para tentar desbloquear unha situación que se fixo efectiva na rolda de prensa do rexedor ourensán na que anunciou que o goberno local deixaría de financiar os festivais de cinema, teatro e música clásica polo seu “elevado custo e escaso retorno económico”. “Sáennos custos maiores aos que teñen en Broadway”, chegou a dicir Jácome.


Jácome

Jácome retirou as axudas a festivais culturais por non ser rendibles economicamente 


Ao festival de teatro o anunciou chegoulles cando xa empezaran a traballar nunha edición que xa planeaban desde xaneiro. “A programación estaba feita e entregada na Concellería de Cultura, como documento base que empregaron para presentarse á convocatoria de axudas a festivais de AGADIC”, comentan desde Sarabela Teatro, que non atopan unha explicación a esta deriva da oferta cultural da cidade máis aló dos argumentos que lles ofrece o propio Concello. “Queren un cambio”, comentan desde a organización como o motivo transmitido desde o consistorio.


A pesar do anuncio, o festival non se quedou só. A Asociación de Actores e Actrices de Galicia, a Asociación Escena Galega, a Mostra internacional de Ribadavia, a Mostra Cómico festiva de Cangas, diversas compañías teatrais como ‘Voadora’, ‘A Panadaría’, ‘Matarile’ ou ‘Talía’ deron o seu apoio ao evento, así como críticos e personalidades do mundo da cultura mostraron o seu apoio a un festival que non queren deixar morrer.


Con todo, e a pesar das moitas mostras de agarimo, o Festival Internacional de Teatro de Ourense queda ferido de morte ao non poder contar sen o seu recurso económico fundamental que pode significar ou ben que teñan que facer malabares para organizar unha edición máis económica sen que repercuta á oferta ou á calidade ou ben que se vexan forzados a botar o peche. Sen o apoio do goberno auriense, ao FITO e aos amantes do teatro non quedará outra opción que facer mutis polo foro e deixar que caia o pano por última vez sobre Ourense e a súa oferta cultural. 

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress