O PP planea que o Regulamento do Parlamento prohiba exhibir camisetas reivindicativas

Polémica no Parlamento de Galicia. O que antes era unha norma non escrita -pero que xa se aplicaba- agora o PP pretende que sexa parte do Regulamento oficial. Toda a oposición criticou o plan para prohibir que a cidadanía exhiba camisetas, chapas ou outros símbolos relacionados cos temas a debate.

Membros do colectivo de Enfermeiras Eventuais en Loita protestando no acceso á Cámara, dentro do hemiciclo, ao prohibirlle acceder coas súas camisetas, nunha imaxe de arquivo

"Buscan amordazar aínda máis esta institución" queixouse o líder de En Marea. Luís Villares acusa a Miguel Santalices de aplicar unha estratexia de "pobreza democrática" que non ten precedentes na historia da Cámara galega.

Desde o BNG interprétase que a proposta implicaría "pechar baixo sete chaves" o debate. O seu portavoz nacional Ana Pontón entende que o plan implicaría que non tería sentido convidar o Parlamento a colectivos sociais, universidades e outros grupos para expoñer o seu punto 

A deputada Luca Chao, do Grupo Común dá Esquerda, queixouse de que os invitados poderían ser expulsados por camisetas por algo tan simple como vestir unha camiseta reivindicativa. Chao entende que habería que ser moito máis flexible e que o enarborado decordo da Cámara ten que ser compatible co dereito para expoñer reivindicacións.

Desde o principal grupo da oposición tampouco se entende o plan. Xaquín Fernández Leiceaga pon o foco na proposta de que só as salas adxudicadas aos grupos poidan acoller actos reivindicativos. O PSdeG entende que a actividade estritamente parlamentaria debe ter preferencia pero reclama unha normativa máis "ampla" que a proposta.

O PP ARGUMENTA QUE SE CONVERTE EN NORMA O QUE XA ERA UNHA PRÁCTICA HABITUAL

Ningunha destas queixas tivo eco no grupo maioritario. Pedro Puy (PP), en rolda de prensa, dixo non entender a raíz da polémica pois cre que o único proposto é converter en normal algo que xa se aplicaba.

O portavoz conservador móstrase en contra de que ao hemicilo accedan persoas que luzan símbolos. Puy argumenta que todos os cidadáns son benvidos ao Parlamento pero que en todo caso débeselles esixir que "manteñan a neutralidade".

Polo escoitado ao PP, hai poucas posibilidades que as protestas realizadas hoxe pola oposición en roldas de prensa freen o plan do presidente do hemiciclo, Miguel Santalices. A Mesa reunirase esta semana e alí a maioría conservadora é probable que impoña o seu criterio.