​Denis Suárez: a afouteza e corazón que está preto de fichar o Celta

O Celta de Vigo ten atado a Denis Suárez, pero agora debe chegar a un acordo co Barça, que espera recadar 15 millóns. 

Denis Suárez con Iniesta no Barcelona

O himno do Celta de Vigo, ese que di “afouteza e corazón”, ben podería ser substituído polo “volve, a casa volve”. Porque na Sede propuxéronse repescar neste mercado a algúns dos xogadores que mellor representaron a camiseta celeste, como Santi Mina e Nolito, que explotaron futbolísticamente en Balaidos, pero tamén daqueles que nin sequera tiveron tempo a debutar co primeiro equipo, como Denis Suárez.

O de Salceda de Caselas, que puxo rumbo á Premier League desde a cidade olívica cando aínda era unha promesa do xuvenil vigués, está preto de regresar a casa. Nos últimos días o club galego pisou o acelerador para levar a bo porto as negociacións e adiantar ao Valencia, o mellor colocado ata o momento para levar a Denis.

O centrocampista era unha das peticións de Marcelino, que xa contou con el durante a súa etapa en Vilarreal, onde se viu a mellor versión do mediapunta. Con todo, a insistencia do Celta, que lle asegura un protagonismo co que agora talvez non podería contar no cadro che, impúxose á idea de xogar a Champions League o próximo ano co actual campión de Copa do Rey.

Denis Suárez nunca escondeu o seu amor polo Celta. O canteirán celeste dixo hai uns días que tarde ou cedo regresaría á disciplina celtiña, e parece que ese momento está preto de concretarse. O acordo económico entre o club e o xogador é total, e agora en Vigo traballan para satisfacer as pretensións económicas do Barça, que pide polo menos 15 millóns para deixar saír ao galego. 

A favor do Celta xoga a necesidade do Barça, que necesita ingresar 70 millóns antes do luns para cadrar contas. En contra, que os 15 millóns polos que podería saír o de Salceda (máis variables) supoñerían un desembolso record en Balaidos. Con todo, os esforzos do Celta de Vigo non caeron en saco roto. “O Celta non pode facer máis por min. Estoulles moi agradecido”. Palabra de Denis. Talvez palabras ditas desde a agfouteza e o corazón.