Luís Menor alimenta a posibilidade de que Ana Vázquez sexa a candidata á alcaldía de Ourense

O presidente da Deputación de Ourense e líder do PP na provincia, Luís Menor, apuntou que "hai moitas posibilidades" de que a candidata do Partido Popular á Alcaldía no Concello de Ourense para as próximas eleccións de 2027 "sexa unha muller".

Así o trasladou, consultado por medios nunha rolda de prensa celebrada este luns tras a xunta de goberno provincial, onde recalcou que o partido "ten en mente a varias mulleres" para encabezar as listas en diversas agrupacións locais da provincia.

Hai que ter en conta que hai meses que soa o nome de Ana Vázquez para liderar as listas na cidade. A deputada deixouse ver frecuentemente na capital nos últimos meses participando en actos, a miúdo relacionados co tema da seguridade. O propio Alfonso Rueda non descartou que sexa a líder, ao sinalar que reune o perfil desado. 

"Temos a máis da metade de mulleres alcaldesas de Galicia. Vai haber máis candidatas mulleres, iso seguro, e estou convencido de que moitas delas van ser alcaldesas. E en Ourense hai moitas posibilidades de que a candidata sexa muller", manifestou.

Neste sentido, celebrou un PP cuxo obxectivo é a "igualdade real" e que "é un exemplo de participación de mulleres e compañeiras". "A posición da muller na vida pública é aínda un pouco inferior á dos homes. Creo que somos un exemplo de participación de mulleres e compañeiras, sen cotas", sinalou.

POSIBLES DISCREPANCIAS INTERNAS
Ademais, preguntado acerca da existencia de posibles militantes "descontentos" que poidan abandonar o partido e crear outros independentes, Menor incidiu na "saúde" do PP en Ourense e subliñou que nun contexto de "cambio e dinamización" hai xente que "sempre pode estar en discrepancia".

"En todas as agrupacións municipais hai partidos independentes e escisións. Dentro da intensa actividade nun partido tan grande, hai xente que sempre pode estar ou non de acordo", engadiu.

Neste sentido, puxo en valor o "ambiente magnífico" durante a romaría popular celebrada este pasado sábado no Carballiño, que contou con máis de 1.500 participantes, así como o "aumento de militantes" e a "renovación de candidaturas" en 42 dos 92 concellos.

"O traballo creo que é bo, evidentemente hai traballo que se ten que facer de maneira discreta e que vai repercutir no momento da Alcaldía. É posible que haxa algunhas candidaturas independentes, eu tómoas con respecto. Non boto a ninguén, quero sumar. Pero se alguén quere saír que saia, non será porque non se lle escoite", aseverou.

Así mesmo, o líder popular na provincia recalcou que as posibles discrepancias "non van desviar para nada o obxectivo que ten marcado a dirección e a maioría da militancia. "Non me preocupa, pero se me ocupa", recoñeceu.

DESCARTA A VALCÁRCEL
Nesta liña, preguntado tamén pola actual situación da agrupación local do PP en Barbadás e a posibilidade de incluír ao actual rexedor, Xosé Carlos Valcárcel --exmilitante socialista que se atopa agora no grupo de non adscritos--, Menor incidiu en que "xogará con xogadores que ten no seu equipo".

"Eu, como os adestradores, falo dos xogadores que teño no meu equipo. Xosé Carlos Valcárcel está nun equipo diferente. Co maior respecto, pero desde logo eu xogarei cos xogadores que teño no meu equipo non cos que figuran noutro equipo", engadiu.

Do mesmo xeito, recalcou que as discrepancias que poida haber no grupo municipal son unha "posición interna do partido" e tratarán de resolvelas "dentro do partido", insistindo en que "non teñen nada que ver cos problemas que tivo ou ten o Partido Socialista". "Nós temos a nosa agrupación de Barbadás, onde hai momentos mellores e peores, pero non ten nada que ver co outro", sostivo.