Sobe o paro en Galicia pero baixan os afiliados á Seguridade Social

As cifras publicadas este martes polo Ministerio de Emprego mostran unha subida nas cifras do paro en Galicia, situándoa en 166.320 persoas desempregadas. Esta cifra contrasta cunha baixada de 6.500 afiliados de media na Seguridade Social, un descenso do 0,64%. 

Fachada dunha oficina de emprego.

O número de parados rexistrados nas oficinas dos servizos públicos de emprego (antigo Inem) subiu en setembro en Galicia en 1.896 persoas respecto ao mes anterior, un 1,15%, por encima da media (+0,6%), ata situar o total en 166.320. 

Segundo os datos que publica este martes o Ministerio de Emprego, en comparación con hai un ano hai na comunidade 17.737 desempregados menos, o que supón un descenso do 9,64%. 

O maior aumento das provincias galegas correspóndese con Pontevedra (+1,31%), que suma 4.556 cotizantes

Pola súa banda, a Seguridade Social perdeu o setembro en Galicia unha media de 6.500 afiliados, o que supón un descenso do 0,64%, aínda que as cifras mantéñense por encima do millón de cotizantas (1.013.888).

Segundo os datos que publica este martes o Ministerio de Traballo, Migracións e Seguridade Social, o descenso máis significativo en termos porcentuais deuse en Lugo, cunha caída do 1,33% e 1.662 cotizantes menos. En Pontevedra, pola súa banda, caeu un 0,57% (-2.041); na Coruña un 0,54% (-2.353) e en Ourense un 0,43% (-444).

Así, por provincias, son 431.672 as persoas dadas de alta á Seguridade Social na Coruña, 355.185 en Pontevedra, 123.334 en Lugo e 103.697 en Ourense.

En variación anual, os afiliados en Galicia creceron un 2,18%, o que supoñen 21.628 máis que en setembro de 2017. Esta cifra incrementouse un 3,1% en Pontevedra, un 1,98% na Coruña, un 1,21% en Lugo e un 1,04% en Ourense.

Por réximes, ao xeneral correspóndenlle 779.958 cotizantes (746.071 do subtipo xeral, 26.869 do sector do fogar e 7.018 do agrario), hai 212.271 autónomos e 21.659 traballadores do mar.

DATOS ESTATAIS

A nivel nacional, a Seguridade Social gañou en setembro unha media de 22.899 afiliados (+0,1%), o seu terceiro mellor dato neste mes desde o ano 2000, ata situarse o total de ocupados en 18.862.713 cotizantes.

No último ano, o número de cotizantes aumentou en 526.551 afiliados, a un ritmo do 2,87%, impulsados principalmente polo Réxime Xeral, que sumou 489.743 traballadores desde setembro de 2017 (+3,2%), e polo Réxime de Autónomos, que gañou no último ano 37.398 afiliados (+1,1%), o seu maior repunte dos tres últimos exercicios.

Como adoita ser habitual tras o fin da tempada estival e o comezo da actividade escolar, a educación foi o sector onde máis creceu a afiliación en setembro, con 53.308 ocupados, mentres que hostalería e comercio protagonizaron os maiores descensos ao perder 39.227 e 31.963 ocupados, respectivamente.

No noveno mes do ano o Réxime Xeral gañou 20.135 afiliados, un 0,1% máis que en agosto, ata un total de 15.539.604 cotizantes.

Pola súa banda, o Réxime de Autónomos (RETA) sumou 4.395 ocupados en setembro (+0,1%), o seu maior repunte neste mes desde 2007, situándose o total de afiliados a este réxime en 3.253.670 traballadores.