Autorizan o desembarco do buque cun brote de gastroenterite entre os seus pasaxeiros e tripulación

Técnicos de Sanidade Exterior autorizaron o desembarque na Coruña do cruceiro 'Ambition', no que un brote de gastroenterite común afectou a decenas de pasaxeiros e a parte da tripulación do buque. 21 persoas co virus permanecen illadas a bordo "seguindo os protocolos sanitarios establecidos", segundo informou a Delegación do Goberno.

O barco atracou ás 09.30 horas na cidade herculina, como estaba previsto. Viña de Bordeus, onde finalmente se autorizou o desembarque da pasaxe. Sobre as 20.00 horas, partirá cara a Xixón, onde ten previsto chegar o domingo, e despois seguirá a súa travesía até Bilbao.

Unha vez no porto da Coruña, ás 10.20, os servizos de Sanidade Exterior accederon ao barco para levar a cabo a inspección correspondente e valorar a incidencia actual do virus para poder tomar unha decisión. Isto está dentro dos controis rutineiros e protocolos establecidos para este tipo de escalas, insistiron as mesmas fontes.

Tras aproximadamente unha hora de inspección e despois de analizar a situación da pasaxe e da tripulación, Sanidade Exterior autorizou o desembarque "ao confirmar que se cumpren as condicións de seguridade e saúde pública correspondentes".

Nestes momentos, 21 persoas con gastroenterite común --de ao redor de 1.700-- permanecen illadas a bordo, segundo detallou a Delegación do Goberno, que insistiu en que se seguen os protocolos establecidos. A administración estatal tamén trasladou unha mensaxe de tranquilidade, destacando que a situación "está monitorizada".