Kits de adrenalina como resposta ás picaduras de velutina

A Asociación de Médicos Interinos de Galicia (ASMIG) insta ao Sergas a enviar kits de adrenalina aos centros de saúde para afrontar as picaduras de avispas asiáticas.

Ante a proliferación de casos de atención de urxencias por avispa velutina, a asociación considera que o Servizo Galego de Saúde debe ofrecer "unha rápida resposta". Así, propoñen "dotar de inmediato" aos centros de kits individuais para o tratamento das picaduras. 

Na actualidade, segundo explica ASMIG nun comunicado, os centros de saúde dispoñen de bochas de adrenalina de 1 mg/m, "polo que, en caso de urxencia vital, habería que buscar a bocha, cargala e coñecer a dose exacta a aplicar". Desde a asociación instan ao Sergas para adquirir os envases individuais, preparados para nenas e nenos menores de 30 quilogramos (150 mcg) ou para persoas de maior peso (300mg). 

ASMIG destaca "o baixo custo dos devanditos kits individuais e a comodidade para a súa rápida aplicación", que poderían ser de vital importancia "dada a alarma social e os casos de morte que, por desgraza, xa acaeceron nos últimos días".

Concretamente, desde que empezou o ano houbo tres mortes en Galicia pola picadura de avispa velutina. A Asociación de Médicos Interinos aproveitou o escrito para transmitir "o firme compromiso dos médicos de Galicia na defensa dunha sanidade pública de calidade" tras a morte dun paciente na Estrada. "Por iso, non se regatearán esforzos á hora de transmitir á opinión pública as peticións que se consideran máis apropiadas para a mellora dun servizo cuxa exposición aos recortes non pode nin debe continuar por máis tempo", sentencian.