Incendio nun vagón dun tren con dous pasaxeiros dentro

A linea FEVE, que acumula protestas polo pouco investimento de RENFE, sofre un novo incidente -van 14 en 15 días segundo o Bloque. 

Incendio no FEVE / BNG Ferrolterra

Efectivos dos Bombeiros do Eume desprazáronse na mañá deste luns ata o apeadeiro de Feve, en Labacengos, na localidade coruñesa de Moeche, para extinguir un lume nun vagón de pasaxeiros dun tren, onde ían dúas persoas que resultaron ilesas.

Segundo informou o 112 Galicia, ningún dos dous pasaxeiros que nese momento viaxaban no vagón víronse afectados e un taxi recolleunos para continuar o seu destino.

Membros de extinción indicaron ao servizo de emerxencias que o lume se iniciou na parte baixa dos motores do convoi e propagouse ao vagón, que foi o único afectado.

ACTUACIÓN DE EMERXENCIAS

Sobre as 9,30 horas deste luns, persoal de seguridade de Renfe solicitou ao 112 Galicia medios para colaborar na extinción do lume e asegurou que non había persoas afectadas.

A partir de aí, pasouse aviso aos Bombeiros do Eume, que se desprazaron ao momento. Tamén, informouse os membros do GES de Ortigueira e á Garda Civil. Tras chegar ao lugar e sufocar as chamas, os membros de extinción refrigeraron a zona ata asegurarse da extinción.

Hai décadas que a liña FEVE que discorre pola costa sofre de continuos problemas. Fallos mecánicos, problemas polo pouco persoal -que forza a que algúns trens viaxen sen revisor- e redución de viaxes son constantes a pesar das continuas denuncias da oposición, como lembrou hoxe o BNG de Ferrolterra:

Hoxe ardeu outro tren na liña Ferrol-Oviedo, á altura de Moeche. Non é unha anécdota, é outra mostra do abandono desta infraestrutura que levamos denunciando desde hai moito: só nos últimos 15 días rexistráronse 14 incidencias, todas por avarías ou falta de material #QueremosTren pic.twitter.com/ozueHHAQRQ

— BNG Ferrolterra (@BNGFerrolterra) 25 de xuño de 2018