Facenda contrata varias veces sen publicidade á consultora da ex-conselleira de Facenda

A Xunta de Galicia adxudicou polo menos seis contratos a Ernst & Young (E&Y) desde que Marta Fernández Currás é  socia de sector público da consultora. Deses seis contratos, cinco adxudicounos a Consellería de Facenda, que dirixiu a propia Fernández Currás durante case tres anos.

Ademais, Facenda deu polo menos dous deses contratos mediante o procedemento negociado sen publicidade, que restrinxe a competencia ao ser a propia Administración quen escolle a que empresas pide prezo. 

Esta é a relación de adxudicacións, que suman máis de 241.000 euros, segundo a Plataforma de Contratos Públicos da propia Xunta:

No seu día, a oposición xa tachara  de "escándalo" o salto á empresa privada da política conservadora. A súa fichaxe en novembro de 2016 reabriu o debate sobre as chamadas "portas xiratorias", o proceso polo que mandatarios públicos acaban tendo intereses privados en sectores que antes eran da súa responsabildade administrativa.

É necesario lembrar, ademais, que antes de chegar a E&Y Currás saíu da Consellería de Facenda para ascender á Secretaría de Estado de Orzamentos. O PP defendeu entón que non se violaba a Lei de Incompatibilididades.

ARGUMENTACIÓNS DA CONSELLERÍA DE FACENDA

"Considera unha boa práctica a Consellería pedir prezo a unha empresa cuxa socia  é unha ex-conselleira dese departamento?" preguntou Galiciapress  á Consellería. Fontes oficiais responden que "se a Xunta impide a contratación a unha empresa que cumpre todos os requisitos legais pode recorrer en delito" e que "todas as contratacións da Xunta cumpren coa máis estrica legalidade, apostando sempre por promover a maior concorrencia posible entre as empresas do sector para que a Administración consiga as mellores condicións posibles".

Obviamente Facenda non pode impedir que E&Y gañe un concurso aberto se presenta a mellor oferta, pero tampouco está obrigada a convidar a esta consultora aos concursos negociados. Desde o Executivo argumentan que o "sector da consultoría especializada en o ámbito público é un sector con un número limitado de empresas".

En realidade o número non é tan limitado, pois a propia Administración destaca que nun dos contratos negociados "a Xunta convidou a sete empresas de consultoría, e E&Y foi a adxudicataria dun dos tres lotes" por ofertar o menor prezo.  O Goberno tamén apunta que a Xunta leva traballando con E&Y desde "hai máis de 20 anos". 

E&E ACÁBAA DE NOMEAR APODERADA

Intervén a ex-conselleira nas ofertas que presenta E&Y a Facenda ou realiza posteriormente algún traballo para a Xunta ao amparo desas adxudicacións? Desde San Caetano din descoñecer a resposta a esta pregunta, que Galiciapress  expuxo tamén a Ernst & Young. 

A pesar de recibir a consulta por teléfono e por escrito, a consultora declinou ata agora dar o seu punto de vista. E&Y unha das catro grandes do sector, acaba de nomear apoderada á ex-conselleira , que xa antes ocupaba unha posición senior no seu staff , pois é identificada nos seus documentos públicos como "socia do sector público". 

A SOMBRA DA FUSIÓN DAS CAIXAS

A figura de Marta Fernández Currás foi moi importante na recente política galega. Como conselleira do primeiro goberno de Alberto Nuñez Feijóo, tocoulle lidar coa fusión das 'caixas' ; un fracaso polo cal acabaron nacionalizadas e, logo, privatizadas a Banesco, hoxe ABANCA.

Na desaparición das caixas de aforro galegas,  o seu actual empleador, Ernst & Young, xogou un papel. Súa foi  unha das tres auditorías que usou o FROB para valorar a defunta Novacaixagalicia, un proceso que desatou unha serie de preitos xudiciais por parte dos accionistas que perderon o seu investimento. E&Y tamén fichou  a directivos das antigas caixas galegas.

Fernández Currás presidindo unha reunión co Banco de España, Caixanova e Caixa Galicia