Podemos e ANOVA advirten que a unidade de En Marea pode chegar a correr perigo

A crise da confluencia agrávase antes de entrar na data decisiva. Podemos Galicia marca territorio e chama a "reconstruír o espazo político do cambio". O portavozo  Villares mantense firme e segue pedindo a dimisión de Paula Quinteiro. Desde ANOVA xa recoñecen que o debate é tal que se xerar "obstáculos" á "unidade popular".

O Consello Cidadán de Podemos Galicia tacha de "inaceptable" que "unha parte" de En Marea trate de "impoñer o seu criterio" sobre o grupo parlamentario en relación co caso da deputada Paula Quinteiro, a deputada que se viu envolvida nun altercado coa Policía Local na madrugada do 18 de marzo.

O grupo parlamentario de En Marea, onde ten maioría de deputados Podemos Galicia (formación á que pertence Paula Quinteiro), acordou abrir un expediente interno á parlamentaria implicada nun altercado coa Policía Local, pero desestimou pedir a súa dimisión, como si quere o portavoz da formación, Luís Villares, e a dirección política do partido.

Así, os participantes do Consello Cidadán avalan por unanimidade a actuación e declaracións da executiva autonómica e os deputados de Podemos neste asunto, á vez que remarcan "a autonomía do grupo parlamentario galego", ao que recoñece como "auténtico referente da pluralidade política e social do rupturismo democrático galego avalado polos votos de máis de 100.000 persoas".

"CAZA DE BRUXAS ORQUESTRADA POLO PP"
Nun comunicado, trasladan o seu respaldo a Paula Quinteiro, a quen considera "vítima dunha caza de bruxas interesada e orquestrada polo PP na que, lamentablemente, caeron tamén algunhas persoas do espazo de cambio".

Por todo iso, Podemos chama a organizacións políticas, mareas municipalistas e movementos sociais a "reconstruír o espazo político de cambio en Galicia".

Así mesmo, empraza a "abordar sen dilación nin ambigüidade a situación de anormalidade democrática e de representación xerada no espazo de cambio".

ELECCIÓNS MUNICIPAIS
Xunto a isto, o Consello Cidadán de Podemos Galicia agradeceu "a implicación" dos inscritos na recente votación sobre as eleccións municipais, na que se asumiu "o compromiso rotundo coa decisión dos inscritos galegos de avalar a proposta da dirección estatal para as próximas municipais".

Neste sentido, destaca que supuxo "a segunda maior participación nunha consulta en Galicia desde Vistalegre II, superando as 6.000 persoas, o que confirma á formación morada como o principal referente do proceso de ruptura democrática e cambio en Galicia".