A morte dunha nena esquecida dentro do coche en Brión, unha traxedia máis habitual do que poida parecer

"Podíanos pasar a calquera. Andamos todos a correr, sempre a contrarreloxo... Estas cousas, para que pasen, tense que dar un cúmulo de circunstancias moi grande pero, por desgraza, pasan". O alcalde de Brión, municipio onde se declararon dous días de loito oficial pola morte dunha nena de dous anos que permaneceu varias horas esquecida polo seu pai no interior dun coche, pon o foco sobre a vida atropelada que vivimos moito no noso día a día. O socialista Pablo Lago fala dunha circunstancia triste e menos excepcional do que cabería esperar, pois cada vez son máis habituais este tipo de noticias que, unha, dúas ou tres veces por ano, golpean á cidadanía cunha terrible advertencia. 
 

SUCESO

O rexedor, que trasladou o seu "profundo pesar" polo ocorrido, chamou aos veciños a participar no minuto de silencio que terá lugar o venres ás 12 horas fronte á casa consistorial. "Este é un concello pequeno, onde case nos coñecemos todos e esta noticia colleunos a todos a contra pié, é un día moi triste para nós", recalcou, apostilando que non é preciso "profundar máis" na dor da familia. 

O foco volve estar na necesidade constante de produtividade nun mundo onde todo parece ir a alta velocidade. En Brión sucedeu o que, por desgraza, sucede tantas veces: o pai leva aos nenos ao colexio, deixa ao maior no centro e, nun descoido, no canto de levar á pequena ao parvulario, acode a realizar un recado ou ao seu centro de traballo esquecendo á menor no interior do vehículo.

Nesta ocasión, foi unha chamada a que levou ao pai da nena a desatender a tarefa para acudir ao seu centro de traballo sen pasar pola escola infantil. Non foi até pasadas as horas, cando a nai acudiu ao centro escolar que se decataron da ausencia da menor, que foi atendida de urxencia na PAC de Bertamiráns e polos técnicos dunha ambulancia medicalizada sen que os sanitarios puidesen facer nada por salvarlle a vida. 

O Grupo de Intervención Psicolóxica en Catástrofes e Emerxencias (GIPCE) está a ofrecer atención especializada á familia e persoal do Equipo Territorial de Policía Xudicial de Santiago, da Garda Civil, investiga os feitos.
 

HEMEROTECA

Basta con acudir á hemeroteca para ver que o de Brión non é nin moito menos un caso illado. Un dos máis recentes e mediáticos foi o ocorrido en Linares hai xusto un ano. Na localidade xienense un home de 72 anos, pai de acollida dun neno de 20 meses, foi detido por deixar esquecido no interior do seu vehículo ao bebé, que morreu polas altas temperaturas dentro do turismo.

De novo, un descoido foi o desencadenamento deste triste suceso. O septuaxenario, exprofesor e que xa fora co seu parella pai de acollida noutras ocasións, foi detido e investigado, acusado dun delito de homicidio imprudente. 

En Valls, Tarragona, os veciños viviron un episodio idéntico en xullo de 2025. Un home deixou esquecido ao seu fillo 6 horas dentro dun coche o primeiro día que tiña que levalo ao xardín de infancia.

Tampouco é a primeira vez que algo así ten lugar en Galicia. Un dos máis recentes é o do Porriño, en xullo de 2023. O menor foi atopado no interior dun vehículo estacionado nun aparcadoiro de terra no lugar da Relva, na parroquia de Torneiros. 

Ese día de xullo, de altas temperaturas, a nai do menor esqueceu ao pequeno e foi un particular o que deu a voz de alarma ao 112 cando xa levaba horas dentro do turismo. Os equipos de emerxencias desprazados ao lugar non puideron facer nada por reanimar ao pequeno. Como en Brión, non foi ata que o pai acudiu ao centro escolar a recoller ao seu fillo que os proxenitores tiveron constancia do que ocorría.