O prezo da droga incautada na Pobra supera os 150 millóns de euros tras un novo achado

Co paso das horas, lonxe de esclarecer a situación, o operativo contra o narcotráfico segue deixando na Pobra do Caramiñal escenas máis propias da ficción televisiva que da estampa habitual deste turístico municipio da ría de Arousa. Á tonelada e media comisada na noite do venres ao sábado e ás detencións a punta de pistola das últimas horas, súmase o achado dun novo alixo con máis de 2.000 quilos de cocaína, o que eleva a cantidade comisada nas últimas 72 horas por encima das 4 toneladas.

GOLPE MILLONARIO Ao NARCOTRÁFICO

Do último golpe faise eco a edición deste luns de Narcodiario, onde conta que as 2 toneladas atopadas nas últimas horas estaban distribuídas en preto dun centenar de fardos, ocultos nunha zona arbustiva moi próxima a Cabío, praia onde tivo lugar a descarga na madrugada do sábado. 

Foi a Policía Nacional a encargada de aprehender a mercadoría, que na rúa tería un valor por encima dos 70 millóns de euros, considerando que o quilo se vende a un prezo superior aos 35.000 euros. En perspectiva, e sen coñecer con exactitude a cantidade de droga incautada, o valor da cocaína intervida roldaría uns 150 millóns de euros, o que pon en dimensión a importancia deste operativo e o duro golpe asestado ao narcotráfico. Trátase da maior cantidade de droga incautada no que vai de ano en todo o continente.

Non se poden descartar de momento máis detencións ou achados, pois o dispositivo segue vixente nun operativo que se está desenvolvendo en silencio absoluto. No municipio barbancés seguen sorprendidos polo ocorrido, especialmente despois das imaxes publicadas este fin de semana con tres homes de nacionalidade colombiana detidos contra a parede dunha vivenda na Virxen do Monte, na parroquia de Santa Cruz de Lesón. 

O tres investigados, ao confrontar coas autoridades, alegaron que estaban a realizar o Camiño de Santiago, unha coartada que non convenceu aos axentes, que os atoparon coa roupa aínda húmida tras a súa fuxida da zona de descarga da droga. As próximas horas son claves para coñecer o alcance da rede de distribución no Barbanza, que nos últimos anos converteuse nun punto quente como porta de entrada á droga en Europa.

MODERNIZACIÓN

Con todo, e aínda que a ría de Arousa foi historicamente a meta de moitos envíos de drogas, os narcotraficantes sofisticáronse nas súas operacións, pasando das planadoras aos narcosubmarinos, cada vez máis frecuentes e presentes nesta última partida con destino A Pobra do Caramiñal. 

Por outra banda, os arrestados pasarán a disposición xudicial este martes no Tribunal de Instancia de Muros, segundo ratifican fontes do  Tribunal Superior de Xustiza de Galicia (#TSXG).