Ecoloxistas en Acción denuncia a altos cargos da Xunta por "prórroga ilegal" de 30 anos á mina na Gudiña

Ecoloxistas en Acción presentou denuncia contra altos cargos da Xunta e contra o administrador da empresa sueca Eurobattery Minerals polo que considera unha prórroga "ilegal" de 30 anos para a concesión mineira San Juan, no municipio ourensán da Gudiña.
 

Nun comunicado, informa de que esta denuncia penal preséntase contra o director xeral de Planificación Enerxética e Minas, Pablo Fernández Vila, e a directora xeral de Calidade Ambiental e Sostibilidade, María José Echevarría, así como contra o administrador de Eurobattery Minerals e a súa filial ourensá Tungsten San Juan SL, Roberto García Martínez, por supostos delitos contra o medio ambiente, prevaricación e desobediencia.
 

A organización ecoloxista expón que "pesan sobre este proxecto mineiro dúas sentenzas firmes do Tribunal Superior de Xustiza de Galicia e do Tribunal Supremo establecendo que calquera prórroga tiña que ser sometida a unha nova avaliación de impacto ambiental". "Ademais, estando a mina proposta a tan só dous quilómetros da fronteira portuguesa, o proxecto debía haber sometido obrigatoriamente a unha avaliación de impactos transfronteirizos", sostén.

Alerta de impactos "severos" con este proxecto sobre o río Rabaçal pola vertedura de augas de altas concentracións de metais pesados "sen ningún tipo de tratamento", unha mina situada augas arriba da fronteira e do parque natural de Montesinho, espazo Rede Natura.

Apunta que tamén o Movimento Uivo denunciou este proxecto ante as autoridades lusas. Máis aló destas actuacións xudiciais en Galicia, explica que colectivos portugueses se dirixiron a Europa para a paralización das actividades da empresa.

"O proxecto aprobado pola Xunta en 2015 prevía explotar unhas 50.000 toneladas de material en cinco curtas ao descuberto durante 10 anos empregando 11 traballadores. O mineral sería enviado á mina de San Finx, en Lousame, para a súa concentración alá. No entanto, o proxecto non se chegou a executar e a declaración de impacto ambiental caducou aos 4 anos", asegura Ecoloxistas en Acción.
 

"A empresa, nominalmente sueca, que iniciou nas últimas semanas grandes movementos de terra, xa ten antecedentes de malas prácticas en territorio galego. En 2020 tentou abrir unha mina ao descuberto de níquel entre Santa Comba e Coristanco, sendo expedientada por realizar sondaxes ilegais sen contar con ningún tipo de autorización. A pesar de que a concesión mineira na que actuaba foi declarada caducada, Eurobattery en ningún momento comunicou este feito aos seus accionistas", recrimina a organización ecoloxista.
 

Agora, advirte da intención de que se presente o proxecto da Gudiña á convocatoria da Comisión Europea de proxectos estratéxicos europeos que pecha en xaneiro de 2026 co fin de acelerar prazos e autorizacións, "pasando por encima da lexislación en materia de augas e espazos protexidos".