Fabiola García garante "máxima calidade e vangarda" no CAPD de Ourense, pero non a súa xestión pública
O DOG recolle a reestruturación orgánica de Política Social para o tratamento diferenciado da valoración de dependencia e discapacidade.
A conselleira de Política Social e Igualdade, Fabiola García, asegurou que a xestión social do CAPD de Ourense "garantirá unha xestión e un servizo de máxima calidade e de vangarda".
A responsable autonómica reuniuse este martes co presidente da Deputación de Ourense, Luís Menor, e con representantes das entidades que conforma o CERMI para presentarlles as principais características do Centro de Atención a Persoas con Discapacidade (CAPD) de Ourense.
Fabiola García destacou que a Xunta destinará 14 millóns de euros á xestión do centro nos próximos dous anos, polo que se garante unha atención de "máxima calidade".
REESTRUTURACIÓN ORGÁNICA DA CONSELLERÍA
Noutra orde de cousas e tamén respecto da Consellería de Política Social, o Diario Oficial de Galicia (#DOG) publica este martes o decreto polo que se modifica a orde anterior que establecía a estrutura orgánica do departamento.
O 27 de maio de 2024 publicouse no DOG o Decreto 139/2024, de 20 de maio, polo que se establece a estrutura orgánica da Consellería.
A través deste decreto, e mediante a creación de dous servizos específicos nos servizos centrais da consellería, avanzouse no tratamento específico e diferenciado das materias de valoración da dependencia e valoración da discapacidade.
"Para conseguir unha maior especialización e eficiencia na xestión, é necesario reforzar a estrutura organizativa dos servizos periféricos, mediante a creación a través do presente decreto dun Servizo de Dependencia e dun Servizo de Discapacidade nos departamentos territoriais da Consellería de Política Social e Igualdade", recolle a publicación.
Así, os departamentos territoriais da Consellería de Política Social e Igualdade estarán integrados polos seguintes órganos de apoio: Servizo de Coordinación Administrativa, Servizo de Xestión Económica, Servizo de Dependencia, Servizo de Discapacidade, Servizo de Familia, Infancia e Dinamización Demográfica e Servizo de Prestacións, Inclusión e Inmigración.
Escribe o teu comentario