Universitarias da USC denuncian a presenza de “maltratadores” nas aulas de Filosofía

Máis de medio centenar de alumnas e alumnos protagonizaron este mediodía unha sentada na Praza de Mazarelos. “Nesta facultade, hai maltratadores!” e “Fóra machistas, desta facultade!” foron dous dos berros máis coreados na concentración convocada polo colectivo estudantil Asemblea Filosofía USC.

As protestas tamén alcanzaron o interior das aulas. Alumnas interromperon  algunhas clases megáfono en man, denunciando a presenza de presuntos acusadores nos mesmos espazos que as súas vítimas.

Tamén se produciron incidentes en zonas comúns, como a cantina e un baño que comparten ambos os sexos.
 

As protestas están a pór nunha difícil posición aos profesores e á propia USC. Aínda que algún dos casos xa tivo percorrido xudicial, non hai sentenza firme que fixe, por exemplo, unha orde de afastamento. 
 

Por tanto, a Universidade non ten, en principio, base legal para impedir a asistencia a clase aos presuntos maltratadores, que teñen dereito á docencia tras abonar a súa matrícula. 

O problema complícase porque nalgún dos casos -hai queixas contra varios homes- o presunto acusador comparte non só curso, senón tamén titor e grupo de traballo coa suposta acosada.
 

Galiciapress púxose en contacto coa Universidade para plasmar o seu punto de vista pero non recibiu resposta ao peche desta noticia. Con todo, fontes da Facultade apuntan a que xa houbo algunha reunión entre as alumnas denunciantes e o equipo reitoral.

Equipo reitoral que está na pista de saída, pois en abril será sustituído polo da nova reitora electa, Rosa Crujeiras. Sen dúbida, o conflito de Filosofía será unha das primeiras tarefas a abordar pola nova Vicerrectoría de Estudantantado e Igualdade, que terá á fronte á profesora Lorena Añón Loureiro, da Facultade de Ciencia Políticas.

Non é a  primeira vez que a Facultade de Filosofía vese envolvida nunha polémica semellante. En 2022, a Asemblea Non Mixta de Filosofía denunciou publicamente o un alumno da facultade por suposto acoso cara a varias estudantes, incluíndo mensaxes persistentes.

As activistas indican que realizarán unha sentada cada martes ao mediodía -a de hoxe é a segunda- ata que a USC actúe e abandone o que entenden como "silencio cómplice" porque "non imos tolerar máis acoso, nin violadores, nin maltratadores nos nosos espazos".