Ecoloxistas advirten da "grave contaminación por metais pesados" en ríos da contorna da mina de Touro

O proxecto para a reapertura da mina de Touro - O Pino segue o seu curso. A pesar de que a Xunta deu carpetazo ao plan de reiniciar a actividade no complexo mineiro hai uns anos, as promotoras da iniciativa volveron á carga e, mesmo, iniciaron un proceso de recollida de currículos. Con todo, aínda non lograron o visto e prace das administracións públicas e teñen que superar un bo número de trámites medioambientais, unhas barreiras que hoxe parecen difíciles de salvar polos alarmantes datos que arroxan os estudos dos grupos ecoloxistas na zona.

INTENTOS DE OCULTALO?

Neste sentido, o último informe de Ecoloxistas en Acción detalla os altos niveis de contaminación nos ríos da contorna ao complexo mineiro, onde a presenza de metais pesados alarma aos ecoloxistas. Tras tomar mostras dos caudais, a plataforma enviou as probas a un "laboratorio acreditado", onde se constatou a "grave contaminación" dos ríos. 

Os cursos de auga afectados polas drenaxes da mina están baixo o foco da organización pola "pasividade da Xunta de Galicia" e as, aseguran, "tentativas da empresa mineira de ocultar a existencia de contaminación grave e persistente". Os ríos Brandelos, Pucheiras, Portapego e a balsa de Angumil foron obxecto destas análises, confirmando neles "a contaminación por catro metais nos puntos analizados". Os niveis de níquel, cadmio, mercurio e selenio son, segundo estes informes, moi superiores ao recomendados e atópanse en caudais que acaban chegando ao río Ulla, dentro da Rede Natura 2000. 

INFORMES NEGATIVOS

No caso do Pucheiras, por exemplo, a presenza de mercurio é 100 veces superior ao máximo permitido, como tamén ocorre no Brandelos e na balsa de lodos de Angumil, mentres que o cadmio ou o níquel están dous e tres veces por encima do máximo que marca a normativa de calidade ambiental. 

Nesta mesma liña, o Portapego reporta niveis de níquel sete veces superiores ao límite legal, co cadmio triplicando o máximo permitido. Todos os datos foron remitidos ao xulgado instrutor de Arzúa, onde se investigan os presuntos delitos contra o medioambiente. 

Para Ecoloxistas en Acción, os resultados proban que, no caso da balsa de lodos, non foi "selada adecuadamente" en 1988 e que "ten filtracións hiperácidas", derivando na contaminación dos arroios próximos. Por todo isto, o colectivo chama ás administracións públicas a "actuar fronte ás denuncias" polas verteduras que se deron entre febreiro e maio "sen ningún tipo de autorización" e que se suman ás do pasado outubro. 

“A pesar da reiteración das verteduras contaminantes e das múltiples denuncias que realizamos, que levaron ao comezo dun expediente sancionador por Augas de Galicia e un procedemento penal, a empresa propietaria, Explotacións Galegas, apenas foi sancionada cunha sanción leve. Unha cantidade que é solto para a empresa infractora”, censura Isabel García, portavoz de Ecoloxistas en Acción.