Acordo entre Educación e sindicatos para recuperar en secundaria as 18 horas lectivas no próximo curso

Esta mañá o conselleiro de Educación, Ciencia, Universidades e FP, Román Rodríguez, pechou un acordo que, sobre o papel, parece moi positivo para a educación e os docentes en Galicia. Trátase dun pacto cos sindicatos CC.OO, UXT, ANPE e CSIF onde se estipula, entre outras cuesiones, unha redución horaria do profesorado de Secundaria, pasando ás 18 horas lectivas a partir do curso 2026/27, o impulso dun plan para o alumnado con necesidades especiais ou a baixada de cocientes en Secundaria e Bacharelato, reivindicacións históricas do conxunto dos sindicatos do ámbito educativo pero que seguen deixando moitas dúbidas, especialmente despois de que o acordo asinado en decembro de 2023 cos mesmos protagonistas e en practicamente idénticos termos acabase nos xulgados por non cumprir tal e como se acordou. 

ACORDO ANTES DA FOLGA

O pacto péchase sen a firma de CIG, sindicato maioritario na mesa sectorial. Tampouco esta STEG, que con CIG-Ensino e outras organizacións protagonizará o próximo 28 de abril unha nova xornada de folga na educación pública galega. Este ano xa son varios os paros que tiveron lugar nos centros escolares de toda Galicia nun curso especialmente candente. 
 

A protesta terá lugar só uns días despois do acordo selado hoxe na Cidade da Cultura e co conselleiro de Educación na foto, a diferenza da instantánea lograda en decembro de 2023, xusto no marco das eleccións autonómicas de febreiro de 2024, onde foi Alfonso Rueda o que aparecía estreitando a man dos representantes sindicais. 
 

CAMBIOS

A redución das 20 ás 18 horas no horario do profesorado foi unha das grandes reivindicacións das centrais críticas con Educación, que pedían tamén unha rebaixa en Primaria. Agora, con esas horas de permanencia no centro empregaranse para "mellorar a calidade dos servizos". 

O pacto incorpora tamén melloras na atención á diversidade, un de débelos do presente curso, onde foron moitas as protestas neste ámbito. A modificación dos catálogos de persoal en etapas de Infantil e Primaria e a ampliación do persoal especializado en Secundaria son algúns dos puntos neste sentido para unha mellor atención aos alumnos con necesidades especiais.

Para o conxunto do estudiantado, o máis significativo é a redución dos cocientes: de 30 a 25 en ESO, de 33 a 30 en Bacharelato. No entanto, haberá que esperar non ao curso que vén, senón a 2028, para que se aplique esta rebaixa.