O 14,1% dos votantes de VOX consideran que se gasta moito en pensións

“Ser vello non é un insulto, é unha consecuencia da idade”, adoitan dicir máis dun, aínda que a frase se atribúe a varias personalidades ben distintas. Unha boa definición, porque cando a xente chega a esa etapa da vida, para algúns cambian moitas cousas; para outros é unha etapa na que se xubilan e, se a saúde os acompaña, poden facer aquelas cousas que non lles foi posible realizar por iso que se chama traballo, obrigacións, falta de tempo. De todo hai na vida da xente, até unha cadea que a tivo atada durante demasiado tempo.

A segunda parte , importantísima por certo, é a “pensión” que vai percibir para ter unha “vellez” tranquila, sen penurias económicas. A cantidade+ está estreitamente relacionado coa cotización que se fixo ao longo da vida laboral: máis cotización, mellor pensión. Produciuse con demasiada frecuencia que, a moitos traballadores, os seus “patróns” (épocas anteriores) non lles cotizaron o que deberían. Consecuencia: a pensión é menor e os efectos son moi malos. Un tema que sempre está presente, porque co custo da vida moitos pensionistas non poden chegar a fin de mes. Que reacción ten a sociedade co tema das pensións? Como a vida mesma, hainas para todos os gustos.

As enquisas que realiza o CIS case sempre fan máis incidencia nos temas políticos, pero hai outros que reflicten o que pensa unha parte da sociedade.

A pandemia da COVID cambiou a percepción das cousas, o comportamento e as opinións sobre temas que afectan á xente. Segundo o CIS, un de cada seis novos entre os 25 e os 34 anos (16,6%) cre que se destina demasiado diñeiro ás pensións e á Seguridade Social. Mentres que entre os mozos de 18 a 24 anos a porcentaxe baixa ao 12,5%. Opinan o mesmo os homes e as mulleres?. Non,un 10,3% dos homes de todas as idades opina que se destina demasiado diñeiro, fronte ao 3,1% das mulleres. Unha diferenza importante.

As persoas que nas últimas eleccións votaron a VOX, o 14,1%, din que se gasta demasiado en pensións. Os votantes do PP, o 8%, opinan o mesmo. Un 3,9% de Sumar e un 3,6% do PSOE teñen a mesma opinión en canto ao gasto en pensións. O que significa que as opinións teñen moito que ver coa ideoloxía.

Aínda que é unha minoría de individuos que  cren que as pensións é un gasto elevado, coa que está a caer, este movemento debería preocupar a todos. A pensión é un dereito dos que traballaron durante tantos anos. A lei marca unha idade de xubilación e un tope de anos cotizados, aínda que as persoas traballen e cotizado moito máis do requirido. Adoita ser o normal, como o é que non se lles regale o diñeiro: adiantárono durante tantos anos. Esas persoas que opinan así deberían sabelo. Claro que son os mesmos que consideran que se gasta demasiado en cultura. Queren unha sociedade inculta, emboubada para manexala mellor.

Dicía o escritor francés Charles Augustin Sainte-Beuve que “envellecer é aínda o único medio que se atopou para vivir moito tempo”. Envellecer forma parte da traxectoria dunha persoa: é lei de vida, nada pode ser como un quere, é a realidade que non se pode cambiar. Esas persoas que cren que as pensións son un gasto innecesario? Hai que lembrarlles que elas chegarán a esa última etapa da vida, se non morren antes, e que as pensións non son un agasallo para os “vellos”: son un dereito pago, e ademais traballando moitas horas. Cousa que eles terán a sorte de traballar menos horas e reivindicarán que as súas pensións son pequenas. As opinións cambian cando os afectados son eles mesmos.