Endesa, a que cobra moi rápido e resolve moi lento

Os tempos cambian tan rapidamente que, en demasiadas ocasións, gáñanse cousas, pero se perden outras que deixan á xente desprotexida e con cara de idiotas. Con iso de modernizar os servizos, que “axudan” as novas tecnoloxías, creo que nalgúns aspectos retrocedeuse. Cando se chama  a un servizo, por exemplo, Endesa, o primeiro que se escoita é unha mensaxe gravada que di: dígame o motivo da chamada. Piden o número do DNI do titular. Non o entendo ben cando llo din número a número, resulta que non o entende“pode repetilo?” Cúmprese o requisito e parece que esa vez a “maquinita” entendeuno. “Espere, que lle paso cun operador”. O seguinte é: o operador está ocupado, chame máis tarde, explícao unha voz enlatada. Téntano bastantes veces e, cando por fin poden falar cun “humano” para explicarlle a causa da súa chamada, sóltalle un royo que aprendeu de corrido e o autor da chamada tenta varias veces cortalo para seguir. Non hai maneira. Ao final hai porse se serio e o operador de Endesa dille que, para a relación de lectura incorrecta, ten que chamar a outra empresa subcontratada que realiza ese labor. Tras preguntarlle varias veces polo número de teléfono para chamar, finalmente  facilítao  O cliente dille que contratou con Endesa e eles deben solucionarlle o problema. Nin por esas, seguen co mesmo mensaxe, dito de corrido, para desespero do cidadán.

Chámase á empresa “que realiza a lectura do consumo ”. Pregúntalle por que non pasaron a mirar o consumo. Faise o longui e a resposta é que vaia o “paganini” e que o mire. A lectura pola que lle facturaron é superior ao consumo que marca o contador. A resposta: “é lectura estimada”, pois pasen vostedes a lela cada mes . Resposta: é mellor que envíe vostede  os datos do e non terá outra vez este problema. Pídeselle que revisen o contador porque pensa que non está ben, xa que a factura é moi elevada. Di que toma nota e pasarao ao servizo correspondente. Cando se lle pregunta cando abonarán o diñeiro cobrado de máis, a resposta: ten que chamar a Endesa, facturación, para que lle digan a cantidade e cando lle abonarán ese diñeiro.

Coa paciencia do Santo Job, chama a Endesa facturación para preguntar.  Dille que non sabe a cantidade, que o ten que mirar. Preguntada polo tempo de espera para recuperar o diñeiro cobrado de máis, a resposta non ten desperdicio: entre un mes e tres meses. Ao que a persoa afectada responde: “Para cobrar de máis son moi rápidos, para pagar  demasiado lentos, como unha tartaruga!” Resposta: “é o que hai”, márcao a empresa. Así que ou se conforma ou se conforma: esperar eses tres meses, mirando cada mes para comprobar que devolvan “o seu diñeiro”.

Chamada á empresa subcontratada por Endesa que levan a cabo a lectura do contador, á que hai xa dúas semanas pedíuselle que fose revisalo. O teléfono, despois de responder o interrogatorio dunha “máquina”, pasa ao operador, un lumbreras, que de novo pregunta o DNI do titular. Facilitado xa, máis outros datos de comprobación. De verdade ese interrogatorio é necesario? Responde que teñen a notificación, entón por que non enviaron a un operario que o mire? Din que non é un tema deles, que parece que marca ben. O cidadán “reclamante” dille que se o tomaron por idiota, que alguén ten que revisar o contador. Con toda a tranquilidade do mundo espetoulle: “pois chame vostede a un particular e que llo mire para ver si funciona”. Négase e esixe falar con algún responsable; o operador faise o “sueco” e repítelle varias veces a mesma resposta. Non quere pasarlle con ningún responsable e, cun xesto digno de pegarlle un bo bofetón, respóndelle: “isto é o que hai. Que teña un bo día”, e cólgalle o teléfono ao sufrido usuario, que só queda denuncialo, sen probas, porque non gravou a conversación. Non son partidaria da violencia, pero chego a entender que alguén poida ter a tentación de enviarlles a determinado sitio e dicirlles calquera cousa, gáñanllo con suor

Creo que a xente aguanta demasiado, que hai empresas como Endesa que abusan, que toman aos seus clientes por idiotas, que non lles solucionan os problemas que eles crearon e, ademais, aténdenos mal. O abuso dalgunhas compañías é máis que evidente. A incorporación das novas tecnoloxías fixo que os cidadáns paguen as consecuencias  da prepotencia  das mesmas, no caso da atención telefónica (non é o único): cando chaman os clientes responde un computador que só fai que  interrogar, e se o que lle preguntan non o ten na súa lista, lévano claro. É unha vergoña que a xente non poida ser atendida por unha persoa desde o principio. Tanta modernidade, tanta tecnoloxía, e pérdese o máis elemental: o trato directo ,persoal, o saber atender como case sempre se fixo. Até cando se vai a consentir que iso siga ocorrendo? Ata que a xente se plante. Menos tecnoloxía na atención á xente e máis trato persoal, resolvendo os problemas cunha atención humana, profesional e empática. Endesa, a que cobra moi rápido (cada mes) e devolve o cobrado de máis a tres meses.