A caza sen piedade ao xornalista Miguel Angel Oliver

Na profesión como na vida mesma, “o que estea libre de pecado que tire a primeira pedra”, dixo Jesús. Santos, o que se di santos hai ben poucos neste mundo. Pecadores moitos porque é cousa da condición humana.

Estes días, a profesión xornalística está revolucionada polo nomeamento de Miguel Angel Oliver como presidente da axencia EFE. Moitos colegas, tamén políticos – esquécense estes últimos do que fan eles cando gobernan- están que rabean e maniféstanse en contra do nomeamento, porque fora Secretario de Estado de Comunicación do 2018 ao 2021 que foi cando cesou.  O nomeamento de Oliver cualifícano como o enchufado de Pedro Sánchez para que controle a axencia pública. Pero é o novo presidente da axencia estatal un comisario político do presidente do goberno?.

O xornalista Miguel Angel Oliver é un profesional como un templo. Traballou durante anos na cadea SER, onde desenvolveu o seu traballo en distintos programas. Deixou a cadea da Gran Vía madrileña para incorporar á  #TV, concretamente a Catro, formando parte dos informativos. Despois marchouse cando foi chamado por Iván Redondo para levar a comunicación do Goberno. Coa marcha de  Redondo, Oliver deixou o seu cargo e reincorporouse a Mediaset onde pedira unha excedencia. A súa marcha , así como a súa incorporación á súa casa  profesional foi con total discreción, como sempre foi a súa traxectoria profesional.

Na súa etapa en Moncloa, realizou moi bo traballo- haberá quen opine o contrario-, é lóxico. Sempre tivo en conta aos medios de comunicación “pequenos” aos que deu cabida en todo o episodio da pandemia da Covid. As roldas de prensa do goberno facíanse telemáticamente e os “medios pequenos periféricos” dispuñan de espazo para preguntar.  No seu día a día tiña tempo para atendelos, non había ningún problema para falar con el. Se  se lle chamaba e non respondía no momento  devolvía a chamada. É máis, mantiña reunións periódicas para coñecer as súas necesidades e a posibilidade de poder solucionar as cuestións pendentes da mellor maneira posible. Sempre se comportou como un profesional, non como un comisario político, aínda que é evidente que o seu traballo lle levaba a defender ao goberno. No entanto, nunca esqueceu que era un xornalista, algo que moitos esquecen.

Cando Oliver deixou a secretaria de Estado de Comunicación, o seu substituto fué un político, Francesc Vallés, que non tiña nin idea -e segue sen tela- do seu traballo. É un político, non un xornalista, que exerce de comisario político da información gobernamental, alguén que despreza á profesión e que só “protexe” ao grupo de xornalistas amigos. Do resto de compañeiros- medios de comunicación-, pasa. Non sabe que é unha institución, que  debe aplicar a trasparencia e a igualdade con todos, cousa que  é evidente que non ten en conta.

Que fixo Vallés nestes anos que leva no cargo? Anular as preguntas dos medios “pequenos”, non recibilos nunca, e por suposto pasar deles, sen dar conta que todos xuntos suman moitos lectores, que ademais teñen o dereito a que se lles respecte. Pero sabe Vallés o que iso significa?. Non, porque a chulería, o desprezo e a falta de profesionalidade son algunhas das calidades que lle adornan. Quizais por iso, Pedro Sánchez ségueo mantendo á fronte da “incomunicación” gobernamental. Esquécese que as minorías son moi importantes e senón que llo digan ao seu xefe que, grazas ás minorías de ERC , Junts  e o voto de Coalición Canarias, entre outros, está a gobernar, de momento. Así que un pouco de humildade  e profesionalidade non lle viría nada mal a Vallés. El que non aprendeu do trompazo que levou cando foi candidato á alcaldía de Reus, a súa cidade,  nas eleccións  municipais do 2014, onde o PSC sufriu a maior derrota da  súa  historia nunha cidade onde xa gobernara. O que declarou  Vallés tras o seu estrepitoso fracaso foi  “non soubemos conectar coa xente” é evidente que foi así e segue si saber conectar, agora cos xornalistas.

Francesc Vallés, que moi empático non é, foi recortando tanto as intervencións dos xornalistas nas roldas de prensa posteriores ao Consello de Ministros que até xornalistas de medios “amigos” denunciaron a situación publicamente. O mesmo ocorre coas viaxes do presidente ao estranxeiro onde tamén limitou a presenza de xornalistas, dos medios que son críticos co goberno. Toda unha estratexia de comunicación que o único que fai é cargar a liberdade dos medios a informar libremente, sen presións. Unha actitude que se contradi coas declaracións de Pedro Sánchez que fala de liberdades e trasparencia, cousa que é a teoría cuxa a práctica é outra ben distinta.

O plan de acción contra os medios é a aposta de Óscar López o xefe de gabinete do presidente, personaxe que no seu día foi secretario de organización do #PSOE ,o peor da historia do partido.
Non coñezo nin persoal, nin telefonicamente a Miguel Angel Oliver, nin por suposto débolle nada, pero me parece desproporcionado e inxustificado que se lle botaron encima “compañeiros” de profesión. É unha caza vergoñosa, cando hai “colegas”- non todos- que forman parte da cota de partidos en faladoiros televisivos e radiofónicos. Non son xornalistas, senón predicadores que os puxeron aí para facer proselitismo político, e non sucede nada. Hai xornalistas que se dedicaron á política e que volveron á súa profesión despois e tampouco ocorre nada como é o caso de Pablo Montesinos deputado do  #PP, quen cando se cargaron a Pablo Casado tivo a honradez de dimitir do seu cargo de deputado e volver á profesión onde segue exercendo, cousa que me parece moi ben.

Os xornalistas que traballaron e seguen traballando nos partidos políticos non necesariamente teñen que ser vetados para volver aos medios nos que traballaban anteriormente, teñen dereito a exercer a súa profesión como calquera outro profesional. Parecía que a caza de bruxas era cousa de tempos do pasado, pero non, séguese exercendo con total falta de ética. 

Deséxolle toda a sorte do mundo a Miguel Angel Oliver, un profesional que sabe exercer a profesión e aínda que non o vai a ter fácil, seguro que o seu traballo, como sempre o vai a realizar cunha gran profesionalidade.