Que é o que máis nos preocupa a todos e todas? Que nos repercute de maneira esencial na nosa vida, desde a infancia até a idade adulta? Que nos une e asemella dando igual como, onde ou quen sexamos? Podemos facernos moitas preguntas similares pero a resposta sempre será a mesma… a saúde.

A nosa saúde, a dos nosos seres queridos, e, mesmo, a daquelas persoas que non coñecemos aféctanos de tal maneira que marca de maneira decisiva o noso percorrido vital a nivel físico, psicolóxico e emocional. Queremos estar sans e cando temos un problema de saúde, sexa o que sexa, queremos a mellor atención sanitaria e coidados posibles.

Por iso, as enfermeiras e enfermeiros, como profesionais cuxo compromiso e vontade prioritaria é proporcionar a atención e coidados que toda persoa necesite, estamos seriamente preocupados polos cocientes de pacientes que temos asignadas baixo a nosa responsabilidade profesional en Galicia. É dicir, o número de persoas ás que debemos atender nun hospital, nun centro de saúde ou en calquera outro centro sanitario e sociosanitario.

Queremos garantir a mellor seguridade e calidade asistencial á hora de atender ás persoas enfermas que sofren algún problema de saúde, de maior ou menor gravidade, pero os actuais cocientes dificúltannolo enormemente. Calquera pode entender que, se deberiamos ter asignadas entre seis ou oito persoas nun hospital e a realidade é que temos até 25, a seguridade e saúde de cada unha desas 25 persoas non é, nin moito menos, a óptima e vese ameazada.

Hai máis dun centenar de estudos científicos nacionais e internacionais que así o aseguran e só fai falta estudalos cun mínimo interese para observar claramente unha similar conclusión en todos eles. A unha maior asignación de pacientes por profesional, máis riscos, reingresos, complicacións e efectos adversos no proceso asistencial, así como un incremento da mortalidade e a morbilidad.

É, foi e será o noso cabalo de batalla. Lograr que calquera persoa enferma que é ingresada nun hospital ou é atendida nun centro de saúde reciba a atención e coidados que merece. O mesmo queremos para os miles de persoas que se atopan nas residencias de maiores e noutros centros sociosanitarios. Máis seguridade e máis saúde e, grazas a iso, máis benestar e mellor calidade de vida para a propia persoa, a súa contorna familiar, e, como non, o conxunto da sociedade.

Este obxectivo tan lóxico, pero tan pouco prioritario para o conxunto de administracións públicas que seguen mantendo un crónico déficit de persoais enfermeiras no noso país e tamén en Galicia, levounos a presentar unha Iniciativa Lexislativa Popular (ILP) que, despois de tres anos desde que entrou no Congreso dos Deputados, atópase xa na súa fase final de tramitación parlamentaria.

O pasado 15 de marzo deuse por finalizado o prazo de presentación de emendas parciais a esta lei que o único que busca é garantir a seguridade asistencial á hora de atender ás persoas enfermas que sofren algún problema de saúde, a través dunha asignación máxima de pacientes por cada enfermeira/ou, para preservar adecuadamente a súa integridade asistencial e axilizar a recuperación da súa saúde e benestar. Agora ten que ser debatida na Comisión de Sanidade para, posteriormente, ser aprobada no Pleno do Congreso.

A mesma confianza que nos fixo impulsar esta Lei ao entender que era unha inescusable necesidade fainos pensar agora que o conxunto de partidos políticos non porá impedimentos para que se aprobe o máis pronto posible e nos termos que aseguren que resultará “un antes e un despois” na atención sanitaria e coidados nos hospitais, centros de saúde e centro sociosanitarios de Galicia.

É a mesma sociedade a que, de maneira reiterada, traslada en sucesivas enquisas e estudos de opinión que a sanidade é unha prioridade e que a actual situación do noso sistema sanitario preocúpalles seriamente. Preocúpalles constatar que cada vez esperan máis, non só xa para ser operado nun hospital, senón para unha simple consulta nun centro de saúde ou cando lles teñen que realizar unha proba diagnóstica.

Antes de que acabe a actual lexislatura, os mesmos partidos políticos que nos volverán a pedir a nosa confianza nas próximas eleccións deberán demostrar o seu compromiso co noso sistema sanitario e sacar adiante a Lei que situará a España, e tamén a Galicia, á cabeza de Europa en seguridade do paciente. Sería un inmellorable logro para facelo realidade durante a Presidencia de España do Consello da Unión Europa.

Non podemos perder máis tempo porque o que está en xogo, o que nos xogamos todos e todas é a nosa saúde, benestar integral e a nosa propia vida.