Nova sentenza do Tribunal Supremo contra DIGI polas condicións laborais do seu persoal en Vigo

Unha máis, e xa van... Os fallos xudiciais amontóanse na caixa de correos de DIGI nos últimos meses, inmersa nunha batalla contra unha boa parte da representación dos traballadores, que vén denunciando as condicións precarias na compañía e o convenio estatal pactado con só unha pequena parte dos sindicatos, ante a oposición dunha parte que celebrou distintas mobilizacións e días de folga este outono e que busca coordinar a nivel nacional para presionar con máis forza á firma de telecomunicacións, que agora ve como unha denuncia da CIG chega até o Tribunal Supremo polas condicións do persoal de Vigo.

TRABALLADORES DE VIGO TRABALLANDO EN OURENSE

Tras os primeiros fallos condenatorios, o caso chegou até o alto tribunal polos recursos de DIGI, que unha vez máis se dá de bruzos coa Xustiza ao conceder, novamente, a razón aos traballadores que operan na área da cidade olívica.

A sentenza do Supremo chega tras o fallo do Tribunal Superior de Xustiza de Galicia e resolve o expediente de maneira directa ao inadmitir o recurso presentado pola empresa, que alegaba a existencia dun acordo co comité "deixando de lado o resto dos feitos". "É dicir, nun único feito fáctico, deixando de lado o resto dos feitos sobre os que hai evidente contradición, sería deixar de lado o claro interese casacional para todo o persoal de DIGI a efectos de evitar diferenzas territoriais en base a diferentes sentenzas dos Tribunais Superiores de Xustiza entre colectivos que traballan de idéntica maneira", reza a sentenza do TS á que tivo acceso este diario. 

"Dotar de seguridade xurídica a toda o persoal de DIGI que se atopa en idéntica situación que os territorios obxecto das sentenzas", refire o Supremo, que inadmite o recurso ao non "apreciar razóns" que permitan a súa consideración tras un cambio na regulación que "afectaba o persoal de campo que, estando adscrito ao centro de traballo de Vigo e prestando servizos sempre dentro da provincia de Pontevedra, pasou, mantendo a adscrición ao centro de traballo de Vigo, a prestar os seus servizos na provincia de Ourense".

"De acordo co razoado e de conformidade co establecido na precitada disposición transitoria, procede inadmitir o presente recurso de casación para a unificación de doutrina e declarar a firmeza da resolución recorrida", gabia o TS, contra o que non cabe recurso. 

DESPRAZADOS E CON CUSTOS

Desde a CIG celebran esta sentenza relativa ás dietas e desprazamentos do persoal vigués sobre as actuacións levadas a cabo en Ourense, onde despregaron fibra óptica na cidade, obrigando a desprazar aos traballadores do centro de Vigo 200 quilómetros entre ida e volta. 

"Facer recaer sobre o traballador, aínda que sexa parcialmente, a carga que supón o desprazamento non está jusitificado de ningún xeito", referendaban desde Inspección de Traballo, tras ter coñecemento de que na política de DIGI "cando os desprazamentos son en distinta provincia á do centro de traballo a empresa asume un dos desprazamentos e outro o traballador". 

"O tempo investido nos desprazamentos desde o domicilio do traballador ao lugar de traballo en caso de prestación de servizos fóra do centro de traballo habitual é tempo de traballo e así o declarou o Tribunal Supremo reiteradamente, así como o Tribunal Superior de Xustiza da UE", detallan desde Inspección, á vez que requiren a DIGI "que de inmediato proceda a contabilizar dentro da xornada de traballo os tempos investidos nos desprazamentos necesarios para chegar ao domicilio do cliente así como para regresar ao seu propio domicilio".