Iberdrola ten 300 puntos de recarga operativos en Galicia e supera os 8.000 en toda España

Iberdrola indica que lidera o mercado da mobilidade eléctrica en España, cun total de 8.100 puntos de recarga pública en funcionamento, dos cales 300 están situados en Galicia. Este despregamento coloca á comunidade galega no oitavo lugar a nivel nacional por número de cargadores. 

Durante 2024, a compañía activou máis do 25% destes puntos, demostrando o seu compromiso co crecemento da infraestrutura de carga. Ademais, Iberdrola di que traballa na incorporación doutros 4.000 puntos, actualmente en proceso de construción ou pendentes de trámites administrativos, que se espera estean operativos nos próximos meses.

Recarga rápida para traxectos longos e sostibles

Un dato relevante é que o 27% dos puntos de recarga de Iberdrola son de alta velocidade (rápida, superrápida e ultrarrápida), permitindo cargar 200 quilómetros de autonomía nun rango de entre 5 e 40 minutos. Esta tecnoloxía, integrada na rede Iberdrola | bp pulse, garante que os usuarios poidan realizar calquera traxecto dentro de España de forma eficiente e respectuosa co medio ambiente.

Os puntos de carga de menor potencia están estratexicamente situados en lugares como supermercados ou centros comerciais, onde os condutores adoitan permanecer máis tempo. Doutra banda, as estacións de carga rápida colócanse a intervalos de menos de 50 quilómetros para facilitar viaxes de longa distancia.