Ofensiva contra a explotación laboral nalgunhas panadarías de Vigo

A Federación Galega de Alimentación, Mar e Terra (FGAMT-#CIG) de Vigo, a través do seu secretario comarcal, Anxo Igrexas, advertiu de que existen establecementos “que a día de hoxe manteñen a persoas traballadoras sen contrato e sen figurar de alta na Seguridade Social”, mentres que noutros casos constatouse “persoal obrigado a realizar máis horas das que aparecen nos seus contratos” ou empresas que non respectan os descansos semanais mínimos establecidos pola lei.

O sindicato subliña que este tipo de comportamentos constitúen unha dobre vulneración, tanto dos dereitos laborais das persoas afectadas como das obrigacións empresariais ante a Seguridade Social, o que “supón unha práctica fraudulenta que xera competencia desleal fronte ás empresas que si cumpren as normas”.

Desde a FGAMT-#CIG aseguran recoller numerosas denuncias de traballadores e traballadoras do sector, moitos deles anónimos por medo a represalias, e que a situación afecto a negocios de distinto tamaño, algúns deles reincidentes nestas condutas.

O sindicato presentou nos últimos meses catro denuncias formais ante a Inspección de Traballo, aínda que lamenta que aínda non se emitise ningunha resolución sobre estes casos. A xuízo da central, este atraso prolonga a impunidade das empresas infractoras e desprotege aos empregados afectados, que continúan traballando en condicións “precarias e ilegais”.

Un dos aspectos máis preocupantes que destaca a FGAMT-#CIG é a manipulación do rexistro de xornada laboral, unha obrigación que desde 2019 deben cumprir todas as empresas. Segundo a organización sindical, “hai negocios que directamente non fan o control horario e outros que, aínda que o fan, falsean os rexistros para facer parecer que se cumpre a normativa, cando en realidade se están excedendo os límites legais de xornada”.

Estas prácticas, advirte a CIG, acaban xerando un contexto laboral de explotación, no que moitas persoas traballan longas horas por baixo do salario correspondente, sen cotizar correctamente nin gozar de vacacións ou descansos. Ademais, apunta que as mulleres seguen ocupando a maioría destes postos infravalorados, sufrindo así unha dobre discriminación: laboral e de xénero.

Ante este escenario, a FGAMT-#CIG esixe á Inspección de Traballo unha campaña de control intensiva no conxunto de panadarías e pastelarías da comarca. O sindicato considera imprescindible unha actuación coordinado que acabe coas irregularidades estruturais do sector e que sirva como advertencia ás empresas que incumpren a lei.