Emerxencia de saúde pública en zonas de Vigo como Stellantis pola contaminación dos incendios de Portugal

“Os niveis elevados de partículas (PM) nas Rías Baixas e no oeste da provincia da Coruña débense ao fume dos incendios do norte de Portugal. Por favor, sigan as recomendacións para a protección da saúde ”, advirte agora mesmo a web da Xunta sobre a calidade do aire. 

Hai motivos de preocupación? Sen dúbida, sobre todo na zona de Vigo. As estacións de Vigo - Coia (situada na avenida de Castelao) e Esta - Estación 1 (situada na fábrica de Stellantis en Balaídos) están a reportar unha “calidade moi mala” debido ao contaminante PM2,5. É o segundo nivel peor posible, o seguinte é pésimo, cando se recomenda usar protección para traballar ao aire libre. 

Segundo a información oficial da Xunta e o Ministerio, cando a calidade do aire é moi mala, os grupos de risco deben  “evitar toda actividade física ao aire libre e considere realizar actividades no interior ou pospolas” e ademais “Seguir meticulosamente o plan de tratamento” para enfermidades como a asma. Para a poboación en xeral a recomendación é “Evitar toda actividade física ao aire libre e considere realizar actividades no interior ou pospolas cando a calidade do aire sexa boa ou moderadamente boa”. Estamos ante un nivel no que “en condicións de emerxencia de saúde pública, toda a poboación pode verse gravemente afectada”.

De feito, a web do Ministerio para a Transición Ecolóxica sinala que agora mesmo hai “condicións de emerxencia para a saúde pública” nas zonas que cobren dúas estacións de control da área de Vigo, Arenal e Estación 1 Leste.

Que risco supoñen estás partículas para a nosa saúde?

As PM2.5 son partículas en suspensión no aire cun diámetro de 2.5 micras ou menos, o que as fai extremadamente pequenas, aproximadamente 30 veces máis delgadas que un cabelo humano. Debido ao seu tamaño, poden permanecer no aire por longos períodos e penetrar profundamente nos pulmóns e mesmo chegar ao torrente sanguíneo cando se inhalan. 
 

 Respiralas supón un risco considerable para a saúde, xa que están asociadas con problemas respiratorios, enfermidades cardiovasculares, danos ao sistema nervioso e, en casos de exposición prolongada, un maior risco de cancro. As persoas máis vulnerables aos seus efectos son os nenos, os anciáns e aqueles con enfermidades preexistentes, como a asma ou enfermidades cardíacas.

O seguinte nivel do ICA é malo. Neste nivel “toda a poboación pode experimentar efectos sobre a saúde e os grupos de risco efectos moito máis grave”. A recomendación para a poboación en xeral é “ reducir as actividades prolongadas e activas ao aire libre , especialmente se experimenta tose, dificultade para respirar ou irritación de garganta”. Para os grupos de risco a recomendación é a mesma que con calidade do aire moi mala.
 

Na actualidade, neste nivel de calidade mala hai media ducia de estacións. Son as dúas de Vigo que non reportan calidade moi mala (Lope de Veiga na Rúa Emilia Pardo Bazán e Oeste 2 na fábrica de Stellantis); a de Cee, a de Dumbría e a de Areeiro, situada detrás da fábrica de Ence en Pontevedra. 

Ademais, as condicións do ICA son “regulares” na estación de Ourense e a de Campolongo, Pontevedra.

En todas as estacións citadas, a causa dos altos niveis de contaminación son as partículas de PM2,5 ou PM10.. 

En definitiva, a lúa e o sol vermello que están a asucar estes días os ceos galegos non son ningunha broma. Son síntomas de que a calidade do aire que respiramos está moi deteriorada pola gran vaga de incendios en Portugal.

Portugal espera controlar hoxe os incendios
 

Actualmente, aínda hai ducias de lumes forestais activos no país veciño que obrigaron a mobilizar a uns 5.000 bombeiros. Son xa unhas  70000 as hectáreas afectadas. 

Até o momento, confirmouse a morte de sete persoas, incluídos catro bombeiros que pereceron mentres combatían os incendios. As vítimas inclúen tanto falecidos directos polas chamas como persoas que sufriron episodios cardíacos debido á presión e o pánico causados polos incendios. Decenas de feridos e centos de evacuados súmanse ás graves consecuencias humanas desta traxedia.  

O goberno portugués ha declarado o estado de alerta máxima e espérase que esta situación se prolongue até polo menos hoxe xoves, cando a calor empezou a reducir polo que se espera que os equipos de emerxencia logren, por fin, controlar a crise.