Máis prazo para as subvencións de mellora enerxética no sector turístico

A mellora da eficiencia enerxética do edificio pódese lograr, por exemplo, mediante a instalación de illamento térmico, xanelas de dobre acristalamiento e equipos de calefacción e refrixeración de alta eficiencia. Tamén se poden utilizar sistemas de iluminación LED de baixo consumo. Estas son algunhas das actuacións para as que a Xunta vai conceder subvencións.

O Diario Oficial de Galicia publica este venres a resolución pola que se acorda a ampliación do prazo para a presentación de solicitudes, en réxime de concorrencia non competitiva, das axudas para actuacións de eficiencia enerxética en empresas turísticas até o 2 de maio.

Segundo detallou a Xunta, as axudas alcanzan os 7,8 millóns de euros e teñen como obxectivo fomentar un turismo sostible e a favor do medio ambiente.

Nunha nota de prensa, Turismo de Galicia sinalou que o 2 de decembro de 2022 publicáronse no DOG as axudas cun prazo de presentación que se estendía até o 30 de marzo de 2023.
 

Con todo, debido a "a dificultade técnica da presentación dos proxectos subvencionables", resulta "aconsellable", para "promover e facilitar a participación" neste procedemento, ampliar o prazo de presentación de solicitudes establecido na convocatoria até o 2 de maio de 2023.

As axudas están destinadas ás pequenas e medianas empresas que sexan propietarias de edificios destinados a aloxamento turístico, no que están incluídos hoteis, pensións, establecementos de turismo rural, albergues turísticos e apartamentos turísticos.

Ademais, as actuacións deberán contar cunha redución do consumo de enerxía primaria non renovable do 30% respecto da situación de partida e coa mellora da cualificación enerxética total do edificio en, polo menos, unha letra medida na escala de emisións de dióxido de carbono.

Os beneficiarios terán un ano para executar as obras desde a resolución positiva da concesión das axudas.
 

ACTUACIÓNS SUBVENCIONABLES
Deste xeito, os aloxamentos turísticos galegos poderán levar a cabo actuacións como a mellora da eficiencia enerxética da envolvente térmica; a mellora da eficiencia enerxética e uso de enerxías renovables nas instalacións térmicas de calefacción, climatización, refrixeración, ventilación e auga quente sanitaria; incluída a instalación de redes de calor e frío alimentadas por fontes de enerxía renovable e/ou calor residual para complexos turísticos de varios edificios; así como a mellora da eficiencia enerxética da instalación de iluminación.