(VÍDEO) O Dépor veña do Mallorca cun gol do debutante Noé Carrillo e pasa a oitavos

Hai noites que non se esquecen, pero por distintos motivos. Está a noite de San Juan de 2019, cando o Deportivo da Coruña, que llas prometía moi felices, viu como o Real Mallorca remontáballe un 2-0 e priváballe cun 3-0 en Son Moix do seu ansiado regreso a Primeira División. E logo está a noite do 16 de decembro de 2025, onde os branquiazuis sanaron un pouco as súas feridas cunha doce vinganza ante os baleares. As dúas pervivirán por sempre no recordo dun raparigo de Teo, que hoxe viu cumprido o seu soño de debutar co club da súa vida.

PARA O RECORDO

O protagonista desta historia é Noé Carrillo, un dos moitos cachorros da factoría de Abegondo. Na escola deportivista, o mozo, nacido en 2006 e con contrato co Dépor até 2027, queimou etapas na sala de máquinas do Fabril até chamar a atención de Hidalgo, que hoxe lle deu a alternativa cos maiores.

Non era un duelo calquera, eran os dezaseisavos de final da Copa do Rei, rolda onde o torneo comeza a pór interesante coa entrada dos participantes da Supercopa. Os herculinos quedaron encadrados nun cruzamento co Mallorca con moitas contas pendentes entre ambos. Con algúns pouco habituais, como Porto, Herrera ou Rubén López, os locais plantaron cara aos de Arrasate, que deu descanso a algúns titulares como Muriqi ou Darder, do que tivo que tirar no segundo tempo.

A primeira parte estivo trabada. O Dépor chegaba á cita coas dúbidas que espertou o 0-3 ante o Sanse. Sen riscos e con máis atención en defensa, os primeiros 45 minutos desenvolvéronse sen moitos sobresaltos, máis aló dun primeiro cuarto de hora inicial onde os dous equipos trataron de resolver o duelo pola vía rápida, aínda que sen éxito.

Non foi até o segundo tempo que os coruñeses dispuxeron das mellores ocasións con Villares pondo en aprietos a Bergstrom. No intercambio de golpes apareceu Porto para frustrar o empeño dos insulars, que se deixaron a puntaría en Palma, con Maffeo aínda lamentando un balón que estrelou no traveseiro cando podía decantar o encontro para calquera dos dous lados.

Foi cos cambios que o Dépor reactivouse e comezou a crecer o murmurio na bancada, conscientes de que un Segunda podía enviar á lona a todo un Primeira como o Mallorca. Noé Carrillo entrou a falta de dez minutos e no seu debut gozou do pracer de convidar aos seus a outra rolda pescando un balón solto na área -tras remate impecable de Bil á madeira- que enviou á rede no minuto 84 para establecer o 1-0 definitivo, pois o marcador non se moveu no tempo que quedaba, onde Riazor foi unha auténtica festa nunha noite grande e para o recordo do novo neno bonito do deportivismo, ao que hoxe lle pica un pouco menos a cicatriz daquela noite de San Juan na que saíu chamuscado.