Até onde chegaría a Selección de Galicia no Mundial de fútbol? As redes acenden o debate

Vieites, porteiro do Leicester na portaría. Liña de tres con Castrín, Carreiras e Javi Rodríguez, flanqueados polas bandas por Hugo Álvarez e Angeliño e con Santi Comesaña e Nico González na sala de máquinas. E, arriba, pólvora e maxia cunha vangarda liderada por Iago Aspas, Borja Iglesias e Gabri Veiga. Esa é a proposta que a conta 'Non vale furar' (@NVFGalicia) fixo en Twitter sobre a súa Selección de Galicia ideal. Un once no que non faltan futbolistas de primeiro nivel e que suscitou un debate sobre o potencial da Irmandiña e as opcións que tería de acudir a unha Copa do Mundo ou de plantar cara no Mundial de Fútbol deste verán.

AUSENCIAS E CAMBIOS

Todo queda en castelos no aire, pois Galicia non participará de ningunha das maneiras no Mundial de Estados Unidos, México e Canadá, nin na Eurocopa de 2028, a pesar de saír gañadora en 2023 da Copa das Rexións da UEFA. Pero neste xogo de fútbol ficción, as redes destacan por encima de todo a calidade do combinado galego, con futbolistas de elite procedentes de equipos como Real Madrid, Manchester City, Roma, O Porto ou Celta de Vigo. 

"Oxalá" ou "É unha burrada de equipo" foron algúns dos pensamentos compartidos polos usuarios, que tamén mencionan que, na proposta desta conta, "non defende nin Cristo". Certo é que este equipo titular resulta un pouco desigual, pois atopamos a todo un internacional con 'A Vermella' como 'O Panda' en punta de frecha, e tamén a un xogador do filial sevillista como Andrés Castrín, crecido no CD Lugo pero que só suma un partido co Sevilla, en Copa do Rei. 

Talvez a posición que esperte máis receos é a portaría, onde os chamados a filas, Vieites, Rubén Blanco e Iván Villar, non son titulares nos seus equipos. Aínda que non xoga nin no Leicester, nin no Olympic de Marsella, nin no Celta, como os seus camaradas guardaredes, Diego Mariño si é titular no Albacete, e nestes momentos podería ser a opción máis interesante para defender a porta galega. Álvaro Ratón e Ian Mackay quedarían como opcións a estudar. 

Entre os seleccionados, ademais, hai ausencias destacadas, como as dos irmáns Bo, Hugo e Guille, xogando a moi bo nivel en Wolverhampton e Real Valladolid, dous valores seguros para os laterais, moi competidos con outros futbolistas como Jonny Otto, Carreiras ou Lucas Vázquez, presentes nesta lista, ou Novoa Ramos e Trilli, outros que non recibiron chamada nesta invención. 

En defensa é notable a "non convocatoria" de José Fontán, futbolista fundamental na zaga do Arouca portugués que creceu a pasos axigantados estes dous últimos cursos no fútbol luso, mentres que a falta de ritmo de Yago de Santiago, que vén de saír dunha longa lesión, puido deixalo fóra da carreira. Ao que lle puido pesar a mala marcha do seu equipo é a Pablo Insua, fixo nun Zaragoza que non levanta cabeza, mentres que Miguel Rodríguez, que non puido manter o altísimo nivel do seu primeiro ano no Utrecht, comeza a recuperar sensacións na Eredivisie. 

Fóra dos focos do fútbol europeo, están Jason Remeseiro, completando unha excelente tempada no Ao-Fayha saudita, ou Rober Pier, na súa primeira experiencia fóra de España, probando sorte no Atlas mexicano. Algún bota de menos a dous nomes exóticos pero galegos, como o de Rafinha, que sen estar retirado leva máis dun ano sen equipo -aplicable a outros clásicos, como Lucas Pérez ou Hugo Mallo-, ou Stefan Bajcetic, aínda unha nova promesa do fútbol nacional pero que este ano aínda non se estreou nas filas do Liverpool. Nunha situación similar atópase Pampín, case sen minutos no Levante, onde o ano pasado foi capital para lograr o ascenso. No Ciutat de Valencia comparte banco con Iker Losada, outro que tampouco se escapa do radar da Irmandiña. 

A GALICIA SUB

Entre os mozos "nas categorías inferiores de Galicia" atopamos a Pedro Villar, talentoso cinco da Masía con pasaporte de Nigrán, ao ourensán Javi Fernández, que queima etapas na canteira do Bayer de Múnic, ou a Lucas Taibo e Paulo Iago, dous leóns do fútbol formativo do Sporting de Portugal que se desempeñan como central e extremo, respectivamente.  

E non mencionamos a Manu Xusto, Dani Rodríguez, Kevin, Bicho, Lemos, David Costas, Quique Fornos, Denis Suárez, Diego Alende... Son tantos os nomes posibles que daría para outra selección dun nivel practicamente idéntico. Galicia, berce de talento, ten futbolistas para dar e regalar. Nun Mundial autonómico, sería unha clara favorita ao título. Quen sabe, talvez un día soe 'Vos Piñeiros' no partido inaugural dunha Copa do Mundo. De momento, deixemos voar a imaxinación...